SEPAH-ın terrorçu Qüds qüvvələri Livandan qaçdılar

SON XƏBƏRLƏR

SEPAH-ın terrorçu Qüds qüvvələri Livandan qaçdılar

2026.03.06, 08:48

İran Azərbaycana yalan deyib və məqsədi İsrailin hədəfində olan terrorçu Qüds qüvvələri üzvlərini Livandan qaçırmaq olub.

Gunaz.tv

Beynəlxalq media orqanlarının yaydığı məlumatlara görə, İsrailin hücumlarının və birbaşa təhdidlərinin artmasından sonra İran İnqilab Keşikçiləri Korpusunun onlarla üzvü son qırx səkkiz saat ərzində Beyrutu tərk edib.

Bir Amerika mediası iki yüksək rütbəli İsrail müdafiə rəsmisinə və vəziyyətdən məlumatlı bir mənbəyə istinadən xəbər verib ki, bu şəxslərin əksəriyyəti “Qüds qüvvələri”nin üzvləri olub. Onlar Livanın Hizbullah qruplaşması yanında hərbi məsləhətçi kimi fəaliyyət göstərir və bu qrupun hərbi planlaşdırılmasında mühüm rol oynayırdılar.

İsrail rəsmilərinin sözlərinə görə, son iki il ərzində Hizbullahın bir çox təcrübəli komandirinin İsrailin hədəfli hücumları nəticəsində öldürülməsindən sonra İranla əlaqəli qüvvələrin bu qrupun hərbi qərarlarında rolu və təsiri daha da artmışdı. Eyni zamanda bəzi mənbələr iddia edir ki, Hizbullah əvvəlcə İsrailə qarşı yeni cəbhə açmaq istəmirdi, lakin sonda mart ayının birində İranın təzyiqi altında münaqişəyə qoşulub.

Son günlərdə isə İsrail ordusu İranla əlaqəli qüvvələrə qarşı bir neçə hədəfli hücum həyata keçirib. Məlumata görə, “Qüds qüvvələri”nin Livan bölməsinin komandiri Tehranda həyata keçirilən hücum nəticəsində öldürülüb, onun müavini isə Beyrutda başqa bir hücumda həyatını itirib.

Bu hadisələrin davamında İsrail ordusu Livanda hələ də qalan İran nümayəndələrinə xəbərdarlıq edərək bildirib ki, ölkəni tərk etmədikləri halda harada olurlarsa olsunlar hədəfə alınacaqlar. Bu xəbərdarlıqdan sonra İsrail müdafiə rəsmilərinin sözlərinə görə, İran İnqilab Keşikçiləri Korpusunun onlarla üzvü Livanı tərk edib. Onların bəziləri Beyrutdakı İran səfirliyinin binasından fəaliyyət göstərirdi.

Eyni zamanda Tehran tərəfindən Livanda qalan bəzi şəxslərin təxliyəsi üçün Azərbaycan Respublikasından kömək istənilməsi barədə də məlumatlar yayılıb.

Azərbaycan Respublikasının Prezidentinin sözlərinə görə, 5 mart gün səhər ona bildirilib ki, İranın xarici işlər nazirinin müavini Bakı ilə əlaqə saxlayaraq “Livanda qalan İran səfirliyinin əməkdaşlarının” çıxarılması üçün kömək istəyib, çünki İranın özü bu əməliyyatı həyata keçirmək imkanına malik olmayıb.
(Əslində isə İran Azərbaycana yalan deyib və məqsədi İsrailin hədəfində olan terrorçu Qüds qüvvələri üzvlərini ölkədən qaçırmaq olub.)

Onun sözlərinə görə, bu müraciəti aldıqdan sonra dərhal göstəriş verib ki, Azərbaycan Respublikası “Livanda qalan İran səfirliyinin əməkdaşlarının” təxliyəsi üçün kömək etsin və hətta onların daşınması üçün təyyarə göndərilsin. O həmçinin vurğulayıb ki, İran tərəfi bu əməliyyatın xərclərini ödəməyə hazır olduğunu bildirib, lakin o cavab verib ki, belə çətin vəziyyətdə bunun üçün pul almağa ehtiyac yoxdur və humanitar yardım ödənişsiz göstərilməlidir.

GünAzTV
R.G

GUNAZ.TV

SON XƏBƏRLƏR