İranın qadın futbolçuları sığınacaq istədi

SON XƏBƏRLƏR

İranın qadın futbolçuları sığınacaq istədi

2026.03.10, 10:14

İran qadın futbol yığmasının beş oyunçusu Asiya Kuboku yarışlarında iştirakdan sonra Avstraliyada qalaraq sığınacaq istəyib. Onlar bildiriblər ki, İrana qayıtdıqları halda saxlanılma və ya cəza riski ilə üzləşə bilərlər.

Gunaz.tv

Asiya Kubokunda iştirak etmək üçün Avstraliyaya səfər edən İran qadın futbol yığmasının beş üzvü yarışların başa çatmasından sonra polisə müraciət edərək sığınacaq istədiklərini açıqlayıb.

Məlumatlara görə, İran komandasının turnirdən kənarlaşdırılmasından sonra futbolçular Qold-Kost şəhərində komandanın qaldığı yeri tərk edərək Avstraliya rəsmilərinə müraciət ediblər. Onlar siyasi və təhlükəsizlik səbəbləri ilə İrana qayıtmaqdan ehtiyat etdiklərini bildiriblər və Avstraliyada qalmaq qərarı veriblər.

Beynəlxalq media məlumatlarına əsasən, bu futbolçular Fatimə Pəsəndidə, Zəhra Qənbəri, Zəhra Sərbali, Atifə Ramazan-zadə və Mona Həmudidir. Bildirilir ki, onlar polisə müraciətdən sonra qoruma altına alınıb və sığınacaq üçün rəsmi müraciət ediblər.

İran qadın futbol yığması 2026 il Asiya Kubokunda iştirak etmək üçün cari ilin yanvar ayında, müharibə başlamazdan əvvəl, təxminən 23 oyunçudan ibarət heyətlə Avstraliyaya səfər etmişdi. Turnirin oyunları Qold-Kost da daxil olmaqla bir neçə şəhərdə keçirilib.

Komandanın oyunlarından birində bəzi futbolçular İranın rəsmi himnini oxumayıb. Bu addım bir çox müşahidəçi tərəfindən siyasi etiraz kimi qiymətləndirilib. Bundan sonra İranın hökumətə yaxın media qurumları sərt reaksiyalar verərək bəzi oyunçuları tənqid edib.

Məlumatlara görə, həmin beş futbolçu Avstraliya polis orqanlarına müraciətdən sonra humanitar viza üçün də ərizə verib. Avstraliya rəsmiləri isə bildiriblər ki, onların müraciətləri hazırda araşdırılır və yekun qərar verilənədək oyunçular qoruma altında saxlanılır.

Bununla yanaşı, Avstraliya hökuməti bildirib ki, əgər komandanın digər üzvləri də oxşar müraciət etsə, onların müraciətlərinə də baxıla bilər.

İran qadın futbol yığması bu turnirdə qrup mərhələsini keçə bilməyib və yarışlardan kənarda qalıb.

GünAzTV
R.G

GUNAZ.TV

SON XƏBƏRLƏR