Bölgədə İran hakimiyyətinə aid olduğu bildirilən hərbi hücumların davam etdiyi bir vaxtda, cümə günü Omanda iki nəfər həlak olub, Dubayın mərkəzində yerləşən bir bina isə havada zərərsizləşdirilən hücumun qalıqlarının düşməsi nəticəsində zərər görüb.

Bölgə mediasının məlumatına görə, bir pilotsuz uçuş aparatı Omanın Sohar şəhəri yaxınlığındakı “Əl-Avhi” sənaye zonasına düşüb. Hadisə nəticəsində iki xarici işçi həyatını itirib, bir neçə nəfər isə yaralanıb.

Omanın rəsmi xəbər agentliyi bildirib ki, başqa bir pilotsuz uçuş aparatı da şəhərin yaxınlığında açıq əraziyə düşüb, lakin bu hadisədə itki qeydə alınmayıb.

Səudiyyə Ərəbistanında isə hərbi rəsmilər hava hücumundan müdafiə sistemlərinin Ər-Riyadda yerləşən diplomatik məhəlləyə yaxınlaşmağa çalışan bir pilotsuz uçuş aparatını vurduğunu açıqlayıb. Bundan əlavə, Əl-Xərc vilayətində və “Rub əl-Xali” səhrasında ən azı yeddi pilotsuz uçuş aparatı zərərsizləşdirilib.

Səudiyyə Ərəbistanının Müdafiə Nazirliyi cümə axşamı axşam saatlarında ölkənin şərq bölgəsində daha altı pilotsuz uçuş aparatının da məhv edildiyini bildirib.

Dubayda isə şəhərin mərkəzində yerləşən bir bina zərərsizləşdirilən hücumdan düşən qalıqlar nəticəsində zədələnib. Dubay hökumətinin media ofisi hadisə nəticəsində xəsarət alan olmadığını açıqlayıb.

Fransa xəbər agentliyinin müxbiri hadisə yerindən bildirib ki, iki güclü partlayış səsi eşidilib, nəticədə binalar silkələnib və şəhərin mərkəzi rayonlarından birinin üzərində böyük qara tüstü buludu müşahidə olunub.

Birləşmiş Ərəb Əmirliklərinin Müdafiə Nazirliyi isə bildirib ki, ölkənin hava hücumundan müdafiə sistemləri cümə günü İran tərəfindən buraxıldığı deyilən yeddi ballistik raketi və iyirmi yeddi pilotsuz uçuş aparatını zərərsizləşdirib.

Associated Press agentliyinin jurnalisti də Dubayın “Əl-Quz” bölgəsində baş verən başqa bir yanğının söndürüldüyünü bildirib.

Əmirlik rəsmilərinin sözlərinə görə, fevralın 28-də müharibə başlayandan bəri ölkə ərazisində mindən çox İran pilotsuz uçuş aparatı və təxminən üç yüz raket zərərsizləşdirilib.

Bu hadisə bir gün əvvəl – cümə axşamı Dubayın maliyyə mərkəzi yaxınlığında bir pilotsuz uçuş aparatının düşməsindən sonra baş verib. İran hakimiyyəti daha əvvəl iqtisadi qurumları hədəf ala biləcəyi barədə hədələr səsləndirmişdi və bu səbəbdən bəzi şirkətlər əməkdaşlarını həmin ərazidən çıxarmışdı.

Münaqişənin başlanmasından bəri Birləşmiş Ərəb Əmirlikləri və digər Körfəz ölkələri dəfələrlə pilotsuz uçuş aparatları və raket hücumlarının hədəfi olub.

Dünyanın ən böyük hava limanlarından biri hesab olunan Dubay beynəlxalq hava limanı da bir neçə dəfə hücum cəhdlərinin hədəfinə çevrilib. Bundan əlavə, Dubay limanı və şəhərin məşhur simvollarından sayılan Palm Cumeyra və Bürc əl-Ərəb oteli də hədəf kimi göstərilib.

Bəhreyndə də cümə günü hava hücumu siqnalları səsləndirilib. Bu ölkənin rəsmiləri münaqişə başlayandan bəri İran tərəfindən buraxıldığı bildirilən 115 raket və 191 pilotsuz uçuş aparatının məhv edildiyini açıqlayıblar.

GünAzTV
R.G