Gunaz TV-nin məlumatına görə, Avropa İttifaqı Şurası insan haqlarının ciddi şəkildə pozulması və xalq etirazlarının zorla yatırılmasında iştirak etdiklərinə görə İran hakimiyyətinə bağlı 16 şəxs və 3 quruma qarşı yeni sanksiyalar tətbiq etdiyini açıqlayıb.

Şuranın 16 mart 2026-cı il tarixində yaydığı bəyanata əsasən, sanksiya siyahısına daxil edilənlər arasında təhlükəsizlik qurumlarının yüksək vəzifəli şəxsləri, Sepah komandirləri və məhkəmə sistemi ilə əlaqəli bəzi rəsmilər var. Avropa İttifaqı bildirir ki, bu şəxslər 2026-cı ilin yanvar ayında baş vermiş küçə etirazlarının zorakılıqla yatırılmasında və etirazçılar, jurnalistlər, ictimai fəallar və siyasi məhbusların hüquqlarının pozulmasında birbaşa rol oynayıblar.

Sanksiya tətbiq edilənlər arasında daxili işlər qurumunun təhlükəsizlik sahəsinə cavabdeh olan rəsmiləri və Sepahın yerli komandirləri də var. Bildirilir ki, onlar müxtəlif şəhərlərdə keçirilən etiraz aksiyalarının zorla dağıdılması əməliyyatlarını koordinasiya ediblər. Həmin etirazlar zamanı çoxsaylı mülki şəxsin həlak olduğu barədə məlumatlar yayılıb.

Avropa İttifaqı həmçinin İranın məhkəmə sistemində çalışan bəzi rəsmiləri də sanksiya siyahısına daxil edib. Onların etirazçılar, qadın hüquqları müdafiəçiləri və ictimai fəallar haqqında ağır hökmlər çıxardığı, məhkəmə proseslərində ədalətli mühakimə prinsiplərini pozduğu bildirilir. Bu şəxslərin saxlanılanlardan məcburi etiraf almaq yolu ilə hökm çıxardıqları qeyd olunur.

Sanksiya siyahısına İran həbsxanalar təşkilatının rəhbəri də daxil edilib. Onun rəhbərliyi dövründə həbsxanalarda siyasi məhbuslara qarşı işgəncə, qeyri-insani rəftar, özbaşına həbslər və fiziki təzyiq halları barədə çoxsaylı məlumatlar yayılıb. Hüquq müdafiəçiləri xüsusilə qadın məhbuslara qarşı pis rəftar və məcburi etiraf halları barədə dəfələrlə xəbərdarlıq ediblər.

Yeni sanksiyalar çərçivəsində üç qurum da siyahıya salınıb. Onlardan biri Tehranda fəaliyyət göstərən Sepah bölməsidir və etirazların yatırılması əməliyyatlarının koordinasiyasında iştirak etdiyi bildirilir. Digər qurum isə Xorasan Rəzəvi vilayətində fəaliyyət göstərən Sepah bölməsidir və həmin bölgədə etirazların sərt şəkildə yatırılması ilə əlaqələndirilir.

Sanksiya tətbiq edilən üçüncü qurum isə İranın hüquq-mühafizə strukturlarına bağlı texnologiya şirkətidir. Avropa İttifaqının məlumatına görə, bu şirkət insanların izlənməsi və nəzarət altında saxlanılması üçün istifadə edilən rəqəmsal nəzarət sistemlərinin hazırlanmasında iştirak edib.

Avropa İttifaqının qərarına əsasən, sanksiya siyahısına daxil edilən şəxslərin Avropa ölkələrindəki aktivləri dondurulur və onların Avropa İttifaqı ölkələrinə səfəri qadağan edilir. Bundan başqa, Avropa vətəndaşlarına və şirkətlərinə bu şəxslərə və qurumlara maliyyə və ya iqtisadi resurs təqdim etmək də qadağan olunub.

Bu qərar Avropa İttifaqının 2011-ci ildən İran hakimiyyətinə qarşı tətbiq etdiyi insan haqları sanksiyaları çərçivəsində qəbul edilib. Son qərarla birlikdə sanksiya siyahısına daxil edilən şəxslərin sayı 263 nəfərə, qurumların sayı isə 53-ə çatıb.

Avropa İttifaqı bildirib ki, bu addım İran daxilində insan haqlarının pozulmasına və etirazların zorakılıqla yatırılmasına cavab olaraq atılıb və məqsəd insanların əsas hüquq və azadlıqlarının müdafiəsinə dəstək verməkdir.

GünAzTV
R.G