Səkkiz gəmi Hörmüz boğazından geri çəkildi; boğazdan keçid riskli hala gəldi

SON XƏBƏRLƏR

Səkkiz gəmi Hörmüz boğazından geri çəkildi; boğazdan keçid riskli hala gəldi

2026.07.04, 19:30

Səkkiz gəminin Hörmüz boğazından keçməkdən qəfil imtina etməsi bölgədə gərginliyin daha da artdığını göstərir.

Gunaz.tv

Gunaz TV-nin məlumatına görə, gəmilərin hərəkətini izləyən məlumatlar göstərir ki, Hörmüz boğazında gərginliyin artması fonunda azı səkkiz gəmi bu strateji su yolundan keçmək üçün nəzərdə tutduğu marşrutu yarımçıq qoyaraq geri dönüb.

CNN telekanalı “MarineTraffic” məlumatlarına əsaslanaraq bildirib ki, şənbə günü səhər Oman sahilləri boyunca hərəkət edən azı beş gəmi, o cümlədən iki avtomobil daşıyan gəmi, kimyəvi maddələr daşıyan bir tanker, neft məhsulları daşıyan bir tanker və bir yük gəmisi bir neçə kəskin dönüş edərək Hörmüz boğazına doğru hərəkəti dayandırıb.

İran rəsmiləri bildiriblər ki, gəmilər Hörmüz boğazından keçmək üçün İrandan icazə almalı və yalnız müəyyən edilmiş marşrutlardan istifadə etməlidirlər. Tehran həmçinin Böyük Britaniya və Fransanın Omanla əməkdaşlığa hazır olduğunu açıqlamasına, eləcə də Hörmüz boğazında gəmiçiliyin qorunması məqsədilə çoxmillətli hərbi missiyanın yaradılması təşəbbüsünə sərt reaksiya verib.

Hörmüz boğazı dünyanın enerji daşımaları üçün ən mühüm marşrutlarından biridir və normal şəraitdə dünya üzrə neftin və mayeləşdirilmiş təbii qazın təxminən beşdə biri bu su yolundan keçir. Bununla belə, məlumatlar göstərir ki, getdikcə daha çox gəmi Oman sahillərinə yaxın marşrutlardan istifadə edir. Bu tendensiya İranın bu strateji su yolu üzərində təsir imkanlarını zəiflədə bilər.

CNN-in məlumatına görə, əvvəlcə digər gəmilərlə eyni vaxtda marşrutunu dəyişən daha üç gəmi, o cümlədən iki kimyəvi maddə daşıyan gəmi və bir yük gəmisi sonradan İran sahillərinə daha yaxın marşrut seçərək Hörmüz boğazından keçib.

Gunaz TV
R.G

GUNAZ.TV

SON XƏBƏRLƏR