KİV: Səudiyyə Ərəbistanı husilərlə münaqişədə Qərbin dəstəyindən narazıdır

SON XƏBƏRLƏR

KİV: Səudiyyə Ərəbistanı husilərlə münaqişədə Qərbin dəstəyindən narazıdır

2026.10.12, 11:36

Səudiyyə Ərəbistanı hakimiyyəti Yəməndəki husilərlə qarşıdurma fonunda Qərb müttəfiqlərinin göstərdiyi hərbi dəstəyin kifayət etməməsindən narazıdır.

Gunaz.tv

“Bloomberg” agentliyi məlumatlı mənbələrə istinadən məlumat paylaşıb.

Məlumata görə, husilərin bu həftə Ər-Riyad beynəlxalq hava limanına zərbələr endirməsi Səudiyyə Ərəbistanının təhlükəsizliklə bağlı narahatlığını daha da artırıb.

Böyük Britaniya bu yaxınlarda krallığa havada yanacaq dolduran təyyarə təqdim etsə də, Ər-Riyadın tələb etdiyi əlavə hərbi yardım hələ London tərəfindən təsdiqlənməyib.

Agentlik ekspertlərə istinadən bildirir ki, hava limanına hücumlar münaqişənin daha genişmiqyaslı qarşıdurmaya çevrilməsi riskini artırır. Belə bir vəziyyətdə ABŞ-nin də münaqişəyə cəlb olunması istisna edilmir.

“Bloomberg”in qiymətləndirməsinə görə, Yəməndəki husilərin hücumları Səudiyyə Ərəbistanı hakimiyyətini təhlükəsizliyi təmin etmək və hücumların qarşısını almaq üçün daha sərt addımlar atmağa sövq edə bilər.

Beynəlxalq Böhran Qrupunun (ICG) Yəmən üzrə eksperti Əhməd Naci bildirib ki, husilər hücumların miqyasını genişləndirməklə Ər-Riyadı geri çəkilməyə və hava əməliyyatlarını dayandırmağa məcbur etməyə çalışırlar.

“Səudiyyə Ərəbistanı bu zərbələri, xüsusilə də onların görünməmiş xarakterini nəzərə alaraq, ciddi eskalasiya kimi qiymətləndirir. Ər-Riyadın buna əvvəlkindən daha güclü hərbi təzyiqlə cavab verməsi ehtimalı var”, – ekspert qeyd edib.

Agentlik yazır ki, münaqişənin kəskinləşməsi ölkədə iqtisadi artımın zəiflədiyi bir dövrdə biznes mühitinə də mənfi təsir göstərir.

Belə ki, BP və “Shell” kimi iri enerji şirkətlərinin bəzi yüksəkvəzifəli rəhbərləri bazar günü Ər-Riyadda başlayan Beynəlxalq Neft Konqresində iştirakdan imtina ediblər.

Səudiyyə Ərəbistanının paytaxtında fəaliyyət göstərən bir sıra beynəlxalq şirkətlər isə əməkdaşlarını məsafədən iş rejiminə keçiriblər.

Qeyd edək ki, oktyabrın 10-da Səudiyyə Ərəbistanının Mülki Aviasiya Baş İdarəsi Ər-Riyad hava limanına hücum nəticəsində azı 12 nəfərin öldüyünü, 309 nəfərin yaralandığını açıqlayıb.

Oktyabrın 11-də hava limanına növbəti hücumun həyata keçirildiyi və xəsarət alanların olduğu bildirilib.

Yəmənin “Ənsar Allah” hərəkatı isə həmin gün ballistik və qanadlı raketlərdən, eləcə də pilotsuz uçuş aparatlarından istifadə etməklə sutka ərzində dörd genişmiqyaslı əməliyyat keçirdiyini bəyan edib.

Ş.E

GUNAZ.TV

SON XƏBƏRLƏR