Tehranda yüzlərlə polisin həyata keçirdiyi bir neçə əməliyyatda 288 nəfər həbs edilib

SON XƏBƏRLƏR

Tehranda yüzlərlə polisin həyata keçirdiyi bir neçə əməliyyatda 288 nəfər həbs edilib

2021.10.20, 07:36

Gunaz.tv

GünAzTV: Yanvarın 22-dən 23-ünə keçən gecə, Tehranda yüzlərlə polisin “gecə asayişi və təhlükəsizliyi” planı əsasında həyata keçirdiyi bir neçə əməliyyatda ən azı 288 nəfər həbs edilib.

Məsələ ilə bağlı, Tehran hüquq-mühafizə qüvvələrinin komandanı Hüseyn Rəhimi, yanvarın 23-də jurnalistlərə açıqlamasında deyib ki, paytaxtda yüzlərlə polisin birgə keçirdiyi silsilə əməliyyatlarda 120-si quldur olmaqla yanaşı ümumilikdə 288 nəfər yaxalanıb: “Tutulanlar arasında oğrular, narkomanlar, narkotik qaçaqmalçıları, eləcə də ölkədə qanunsuz yaşayıb fəaliyyət göstərən 68 xarici vətəndaş var. Dünən gecədən başlayan və bu gün sübhə qədər davam edən əməliyyatlar, əsasən paytaxtın müxtəlif park və çayxanalarında, eləcə də qanun pozuntusu ilə məşğul olanların toplaşdığı digər məkanlarda keçirilib.

Əməliyyat nəticəsində həmçinin qanun pozuntusuna yol verən 89 iş yerində axtarış aparılıb, 252 kiloqram narkotik maddələr və 28 ədəd qanunsuz silah aşkarlanaraq götürülüb. Tehran polisi paytaxtın təhlükəsizliyini qoruyub saxlamaq üçün bu kimi əməliyyatları bundan sonra da davam etdirəcək”.

Qeyd edək ki, İran polisi, Tehranda və ölkənin digər iri şəhərlərində asayişi və təhlükəsizliyi qorumaq adı və bəhanəsi ilə vaxtaşırı əməliyyatlar keçirərək kütləvi həbslər həyata keçirir. Son həftələrdə, İranın 101 şəhərində hakimiyyətə qarşı keçirilən kütləvi xalq etirazlarının ardınca, Tehranda və ölkənin bir sıra digər şəhərlərində elan olunmamış fövqəladə vəziyyət rejimi hökm sürür.

GUNAZ.TV

SON XƏBƏRLƏR