Ərdəbilin millət vəkilləri dövlət rəsmilərinin əyalətdə işsizliklə bağlı yalan açıqlamalarına etiraz bildiriblər

SON XƏBƏRLƏR

Ərdəbilin millət vəkilləri dövlət rəsmilərinin əyalətdə işsizliklə bağlı yalan açıqlamalarına etiraz bildiriblər

2021.10.20, 07:36

Gunaz.tv

GünAz TV: Ərdəbilin millət vəkilləri Rza Kərimi və Südeyif Bədri əyalətdə işsizlik səviyyəsi və problemin aradan qaldırması üçün ayrılan vəsait haqda əsassız statistik məlumatların yayılmasına etiraz bildiriblər.

Bu barədə iyulun 15-də “İsna” xəbər agentliyinə danışan Rza Kərimi açıqlanan statistik məlumatların mənbəyinin dəqiq məlum olmadığını deyib.

“Kəndlərdə məşğulluq tədbirləri və bu işlər üçün verilən kreditlərlə bağlı yayılan statistik məlumatlar dəqiq deyil, ona görə də İctimai Rifah, Əmək və Kooperasiya İdarəsi bu məsələyə yenidən baxmalıdır. Ümumiyyətlə son 4 ildə əyalətdə məşğulluq səviyyəsi ilə bağlı açıqlanan rəqəmlər həqiqəti əks etdirmir. Hesab edirəm ki, bu sahədə məlumatlar reallığa uyğun şəkildə hazırlanmalıdır”- deyə o bildirib.

Millət vəkili Ərdəbil əyalətində iş yerlərinin açılması üçün heç bir kredit verilmədiyini xüsusi diqqətə çatdırıb. O bildirib ki, banklar əhaliyə kredit vermir, belə bir proses müşahidə olunmur.

R.Kərimi “Kəndlərdə məşğulluq sahəsinə 50 milyard tümən məbləğində pul ayrılıb” başlığı ilə yayılan xəbəri təəccüblə qarşıladığını bildirərək qeyd edib ki, bu məlumat doğru deyil, əməldə belə bir hadisəyə şahid olmamışıq.

Ərdəbilin digər millət vəkili Südeyif Bədri isə Ərdəbil Əyalətinin məşğulluq üzrə işçi qrupunun İranın Əmək nazirinin qatılımı ilə keçirdiyi iclasda bu barədə danışıb.

“Dövlət rəsmilərinin işsizlik səviyyəsinin aşağı düşməsi ilə bağlı rəsmi açıqlamaları yanlış məlumatdan başqa heç nə deyil və reallığı əks etdirmir. Bütün bunlar yanlış statistik məlumatlar quraşdırmağa bənzəyir. Əyalətdə məşğulluqla bağlı heç bir müsbət dəyişiklik hiss olunmur”- deyə o bəyan edib.

Südeyif Bədri Əmək nazirinin qatıldığı tədbirdə Ərdəbil Əyalətində iqtisadi və ictimai vəziyyətin yaxşı olmadığını dəfələrlə dilə gətirib.

İqtisadi sahədə Güney Azərbaycanın digər bölgələri də Ərdəbil Əyalətindən fərqlənmir. Rejimin ayrı-seçkilik siyasəti, dövlət büdcəsinin ədalətsizcəsinə paylanılması, bölgəyə sərmayə yatırılmaması, iqtisadi tənəzzüldən dolayı sənaye və istehsal müəssisələrinin ardıcıl bağlanması və s. Azərbaycan əyalətlərində işsizlik səviyyəsini günü-gündən artırdığı üçün bu məsələ milyonlarla soydaşımızın əsas probleminə çevrilib.

N.S