GünAzTv: ATƏT-in Minsk Qrupunun həmsədrləri noyabrın 24-də Rusiya xarici işlər naziri Sergey Lavrovla görüşüblər.

Rusiya XİN-in məlumatına görə, həmsədrlər Robert Bradtke, Bernar Fasye və İqor Popov ATƏT sədrinin şəxsi nümayəndəsi Anjey Kasprşiklə birgə Lavrovla dekabrın 1-2-də keçiriləcək Astana sammiti kontekstində Dağlıq Qarabağ münaqişəsinin nizamlanmasına dair aktual məsələləri müzakirə ediblər.

Xəbər verildiyi kimi, noyabrın 22-də Ermənistan, Azərbaycan və Rusiya xarici işlər nazirlərinin Moskvada görüşü olub. Nazirlər razılaşıblar ki, Astana sammitinə qədər yenidən bir araya gəlsinlər. Bu görüşün noyabrın 27-də Həştərxanda baş tutacağı bildirilir. Nazirlər prezidentlərdən ötən ay Həştərxan danışıqlarında aldıqları tapşırığı icra edirlər. Həmin görüşdə danışıqlara vasitəçilik edən Rusiya prezidenti Dmitri Medvedyev bildirmişdi ki, münaqişənin nizamlanmasının baza prinsiplərini razılaşdırmaq üçün ATƏT sammitinə qədər xarici işlər nazirlərinə intensiv işləmək tapşırığı verilib. Əgər baza prinsiplərini razılaşdırmaq mümkün olsa Astanada Ermənistan və Azərbaycan prezidentləri arasında münaqişənin həllinə dair “yol xəritəsi” imzalana bilər.Azərbaycan xarici işlər naziri Elmar Məmmədyarova görə, ATƏT sammiti Qarabağ məsələsinin həllində dönüş yaranması mümkündür. Lakin xarici ekspertlər bu məsələdə nikbin deyil. ABŞ-dakı “Heritage” fondunun eksperti Ariel Koen erməni mətbuatına müsahibəsində deyib ki, əgər ATƏT sammitində nəticə əldə etmək mümkün olsa, bu, çox yaxşı nəticə olardı. Onun sözlərinə görə, sənəd şəklində imzalanmasa belə “yol xəritəsi”nin sammitdə elan olunmasının özü də ciddi nəticə sayıla bilər. “Lakin təəssüf ki, mən pessimistəm, atəşkəsin əldə edilməsindən 16 il keçib, ancaq dəyişən heç nə yoxdur. Əgər tərəflər ”yol xəritəsi"ni razılaşdırsalar sülhə qapı açmış olardılar, bu, Ermənistanla Türkiyə arasında normallaşma prosesinə də kömək edərdi. Bununla belə, mən pessimistəm və bir o qədər də realistəm. Hesab edirəm ki, Astana sammitində “yol xəritəsi”nin razılaşdırılması ehtimalı 50 faizdən çox deyil".Münaqişənin nizamlanmasında əsas rolun Rusiyada olmasını şərh edən amerikalı ekspert deyib ki, Moskva Cənubi Qafqaza və bütün keçmiş sovet respublikalarına dair öz mövqeyini formalaşdırıb. Rusiya bu regionu özünün üstün maraqlar zonası hesab edir. Bu cür zonanın yaradılması üçün Rusiya bütün mümkün rıçaqlardan, o cümlədən Kollektiv Təhlükəsizlik Müqaviləsi Təşkilatından, hərbi bazalardan, silahla təminatdan istifadə edir. “Amerikaya gəldikdə isə həqiqətən Birləşmiş Ştatların başı Əfqanıstana, İraqa çox qarışıb. Bundan təkcə Rusiya yox, digər regional oyunçular, İran, Türkiyə də istifadə edir”.Ermənistan prezidenti Serj Sərkisyan isə Astana sammiti ərəfəsində Türkmənistana səfər edərək orada Qarabağa dair bəyanatlar verib. “Cənubi Qafqazda təhlükəsizlik məsələlərini də müzakirə etdik. Türkmənistan prezidentinə Qarabağ münaqişəsinin tənzimlənməsi yollarına baxışımızı çatdırdım. Bildirdim ki, daimi hərbi ritorika və görünməmiş silahlanma bölgədə çox gərgin vəziyyət yaradır” deyə, o türkmən həmkarı ilə görüşdən sonra bildirib. Jurnalistlərə açıqlamasında Dağlıq Qarabağ münaqişəsindən söz açan Ermənistan prezidenti deyib: “Ermənistanın mövqeyinə görə, böhranlar və münaqişələr yalnız dinc yolla, beynəlxalq hüququn prinsip və normaları - güc tətbiq etməmək və güc tətbiqi ilə hədələməmək, dövlətlərin ərazi bütövlüyü, xalqların bərabərliyi və öz müqəddəratını təyin etmək hüququ əsasında həll olunmalıdır. Yalnız bu cür yanaşma ilə ədalətli və uzunmüddətli sülhə nail olmaq mümkündür”. Yeni musavat