GünAzTv: İki qardaş ölkə olan Azərbaycan və Türkiyə bütün sahələrdə olduğu kimi, hərbi sahədə də əməkdaşlıqlarını dərinləşdirməkdədir.

2-3 noyabr tarixlərində ölkəmizdə səfərdə olmuş Türkiyənin milli müdafiə naziri Vecdi Gönülün Azərbaycanda keçirdiyi görüşlər də buna xidmət edib. Əvvəlcə Azərbaycan Prezidenti İlham Əliyev tərəfindən qəbul edilən V. Gönül dünən azərbaycanlı həmkarı, general-polkovnik Səfər Əbiyevlə bir araya gəlib. Hər iki görüşdə ölkələrimiz arasında hərbi əməkdaşlığın inkişaf etdirilməsi məsələləri geniş müzakirə olunub.

Müdafiə nazirləri arasında keçirilmiş geniş tərkibli görüşdə S. Əbiyev bildirib ki, Azərbaycan və Türkiyə tarix boyu bir-birlərinə arxa olmaqla yanaşı, sınaq günlərində də birlikdə olublar, Azərbaycan erməni işğalına məruz qaldığı ilk vaxtlarda da bunu yaxından hiss edib. Nazirin sözlərinə görə, təəssüf doğuran hal odur ki, bir sıra beynəlxalq qurumlarda istər Azərbaycan xalqına, istərsə də Türkiyəyə qarşı yönəlmiş terrorçuluq fəaliyyəti özünün lazımi qiymətini almayıb. Dağlıq Qarabağ münaqişəsinə toxunan S. Əbiyev Ermənistanın Azərbaycana qarşı apardığı işğalçılıq siyasətinin nəticələrinin aradan qaldırılması və problemin danışıqlar yolu ilə həll edilməsi üzrə proseslərin davam etdiyini qeyd edib: “Lakin sülh danışıqlarının nəticə vermədiyi halda, Azərbaycanın başqa imkanlardan istifadə edəcəyi istisna deyil”.

S. Əbiyev bildirib ki, iki ölkə arasında hərbi, hərbi-texniki və hərbi təhsil sahəsində əlaqələr inkişaf etməkdədir, gələcəkdə də həmin prinsiplər əməkdaşlığın prioritetlərini təşkil edəcək. Nazir sözünə davam edərək deyib ki, bu görüş, aparılan danışıqlar dostluq və əməkdaşlığın genişlənməsinə yeni töhfələr verəcək.

Öz növbəsində, V. Gönül də Azərbaycanla Türkiyənin müxtəlif istiqamətlər üzrə, o cümlədən müdafiə sahəsində geniş əməkdaşlıq məsələlərindən söhbət açaraq perspektivdə də bu əlaqələrin dərinləşdirilməsinin zəruriliyini vurğulayıb.

Türkiyəli qonaq dünən Azərbaycanın müdafiə sənayesi naziri Mərdan Camalovla da görüşüb. M. Camalov görüşdə: “Azərbaycan müdafiə sənayesində Türkiyə ilə yüksək səviyyədə əməkdaşlıq edir və bu gün (dünən-red.) bir sıra layihələr bu əməkdaşlıq çərçivəsində reallaşdırılıb”,- deyib. Hazırda Azərbaycanın müdafiə sənayesi sahəsində 60-dan çox ölkə ilə əməkdaşlıq etdiyini deyən M. Camalov Türkiyə ilə əməkdaşlığımız bunun ən gözəl nümunəsi olduğunu söyləyib: “Hazırda Müdafiə Sənayesi Nazirliyinin “Şərq” İstehsalat Birliyi TİSAŞ şirkəti ilə birlikdə 3 tapança modelinin istehsalını həyata keçirir. Eyni zamanda nazirlik Makina və Kimya, ASELSAN kimi şirkətlərlə müxtəlif layihələr üzərində işləyir. Artıq Türkiyə ilə bir sıra layihələr - atıcı silahların istehsalı, döyüş sursatlarının, mühəndis texniki vasitələrinin, onların ehtiyat hissələrin idxalı, maskalanma torlarının istehsalı üçün xammalın alınması, 60 və 82 mm çaplı minaatanlar üçün yarımfabrikatlarının Azərbaycana gətirilməsi üçün müqavilələr imzalanıb”.

V. Gönülün rəhbərlik etdiyi nümayəndə heyəti dünən Dövlət Sərhəd Xidmətinin rəisi, general-leytenant Elçin Quliyevlə də görüşüb.

Qeyd edək ki, Türkiyədən gəlmiş nümayəndə heyətində Müdafiə Sənayesi Katibliyi, ROKETSAN, ASELSAN, Makina və Kimya, həmçinin digər hərbi şirkətlərin rəhbərləri də təmsil olunur.