GünAzTv mətbuat mərkəzinin növbəti müsahibi Aydınlar Partiyasının sədr müavini, politoloq Qorxmaz İbrahimlidir.

Bu günlərdə Avropa Şurasının Ermənistanda səfərdə olan baş katibi Torbyorn Yaqland mətbuat konfransında “Sabah Azərbaycan müharibəyə başlayacağı təqdirdə Avropa Şurası buna qarışmayacaq” deyə bildirdi. AŞ rəhbərindən belə bir açıqlamanın verilməsi beynəlxalq arenada baş verən geosiyasi şəraitin ölkəmizin xeyrinə dəyişdiyini göstərirmi? Sualımızın cavabını almaq üçün Aydınlar Partiyasının sədr müavini, politoloq Qorxmaz İbrahimlinin GünAzTv Mətbuat Mərkəzinə verdiyi müsahibəsini təqdim edirik.

-Artıq beynəlxalq ictimaiyyətə sirr deyil ki, Azərbaycan öz torpaqlarını azad etmək üçün hazırdır. Hərbi büdcəmizin 3-mld dollara çatdırılması Ermənistan üçün siqnal olmalıdır. Ordumuz müasir silahlarla təmin edilir.

Ermənistan mətbuatının yazdığına görə, əhali ilə hakimiyyət arasında ciddi narazılıq baş qaldırmaqdadır. Orduda hər gün itkilər baş verir. Ölkədə siyasi-psixoloji vəziyyət gərginləşməyə doğru gedir. Bu, vəziyyət Ermənistanı məhvə sürükləyir. Ölkənin siyasətçiləri, sosioloqları, psixoloqlar həyacan təbili çalırlar.

Bu şəkildə baş verən hadisələr beynəlxalq təşkilatların diqqətindən yayına bilməz. Onlar ölkədə baş verən prosesləri diqqətlə izləyirlər. Əgər sabah savaş baş versə, Ermənistanın bir dövlət kimi çökəcəyi şübhəsizdir.

Artıq bu gün  qərb mətbuatında da Ermənistanın sülhə gəlməsi ilə bağlı ciddi məqalələr yazılır. İndi ən çox diqqət çəkən məqamlardan biri də Rusiyanın əksər hərbi-siyasi analitiklərinin Azərbaycanın hərbi cəhətdən gücləndiyini  və Ermənistanın vəziyyətinin ağırlaşdığını dilə gətirmələridir.

-Əslində Ermənistanın arxasında Rusiya və müəyyən güclər durur.

-Ermənistan siyasətçilərinə sual vermək istərdim: son 20 ildə Ermənistan nəyə nail oldu? İndi gəlin ölkənin siyasi-ictimai və sosial vəziyyətini diqqət edək: Ölkə səfalət içindədir, insanlar bir tikə çörək üçün başqa ölkələrə üz tuturlar. Təkcə, bu il 70 min insan ölkəni tərk edib. Regionda gerçəkləşən iri iqtisadi layihələrdən məhrum olublar. Ölkədə demokratikləşmə prosesi donub. İqtidarın dəyişilməsi uğrunda ciddi savaş gedir. Qarabağ klanı ölkədə at oynadır. Düzdür, Rusiya dövləti Cənubi Qafqazda təsir imkanlarını saxlamaq üçün Ermənistan ona forpost dövlət kimi lazımdır. Amma, bu ölkənin xilas yolu ola bilməz.

Bu gün Ermənistanda  bir  nəfər belə insan yaşasa, bu Kreml üçün kifayyət edir. Ermənistanın gələcəyi Rusiyanı maraqlandırmır. Çünki ölkənin açarı Rusiyanın əlindədir. Qərb dövlətləri Ermənistanı Rusiyanın təsirindən çıxarda bilməyəcəklər. Buna nə coğrafi-siyasi  amillər, nə də tarixi şərait imkan verir.

-Bəs, erməni lobbisinin imkanlarını nəzərə almırsınız?

-Bir ölkənin inkişafı onun güclü, sağlam iqtisadiyyatı ilə ölçülür. Bu gün Ermənistan iqtisadiyyatı yoxdursa, hansı lobbi fəaliyyətindən danışmaq olar. Erməni lobbisi Ermənistanın gələcəyini düşünürsə ilk öncə mənasız, reallaşması mümkün olmayan “Böyük Ermənistan” ideologiyasından, “saxta soyqırım” iddialarında əl çəkməlidir. Yoxsa, neçə illərdir ki, diasporun göndərdiyi pullar rüşvət  içində batan mafioz hakimiyyətin əlinə keçəcək.  

- Bir vaxtlar ölkəmizlə bağlı yaranan informasiya qıtlığının aradan qalxdığı görünür. Sizcə, bunu Azərbaycan diplomatiyasının uğurları hesab etmək olarmı?

-Bəli, bir faktı demək kifayyətdir ki, Metyu Brayzanın Azərbaycana səfir təyinatı ilə bağlı erməni lobbisinin ona qarşı apardığı antifəaliyyətinə cavab olaraq, Amerika mətbuatında erməni lobbisinin və ermənipərəsət senatorların əleyhinə məqalələr çap olundu. Bu, Azərbaycanın lehinə işləyən faktdır. O, cümlədən Almaniya, İngiltərə, İsveç, İsveçrə və s. mətbuatında ölkəmizin xeyrinə maraqlı analitik yazıların çap olunması, bir zamanlar ölkəmiz haqqında yaranan antiinformasiyanı zəiflədir. Bu işlərin həyata keçməsində fədakar diaspor fəallarımızın əməyini də qeyd etmək lazımdır.

Söhbətləşdi: Elnur Eltürk