Günaz.tv Mətbuat Mərkəzinin bu dəfəki müsahibi deputatlığa namizəd, “Yeddi Dövlət Bir Millət” Konseyinin başqanı, tanınmış jurnalist Azər Həstərdir.

-Azər bəy, deputat seçiləcəyiniz təqdirdə Güney Azərbaycan məsələsinə nə qədər önəm verəcəksiniz?

-Bu məsələ mənim seçilib seçilməməyimə bağlı deyil. Bəllidir ki, mən bütün çalışmalarımda Güney Azərbaycan məsələsini həmişə gündəmdə tutmuşam. Yəni bu məsələni özlərinin siyasi iddialarına alət edənlərdən deyiləm. Bununla belə düşünürəm ki, canımızın Güney parçası məsələsini parlament tribunasından daha gur səslə demək də pis olmazdı. Bu gün bəzi millət vəkilləri var ki, milli davada olduqlarını desələr də Güney Azərbaycan məsələsini bir dəfə də olsun parlament tribunasından səsləndirməyiblər. Mən isə hər zaman bu məsələni diqqətdə saxlamışam. Deputat seçiləcəyim təqdirdə isə millət vəkillərindən ibarət qrup düzəldərək tez-tez Təbrizə, Ərdəbilə səfərlər etməyi düşünürəm. Ən azından oradakı insanların bizi görərək daha da ürəklənməsi üçün.

-Bu gün türk dünyasının birliyi istiqamətində Güney Azərbaycan amili nə qədər önəmli rol oynayır?

-Güney Azərbaycan problemi çözümə qovuşmadan türk birliyi tam ola bilməz! Çünki Azərbaycan özü bütövlükdə türk dünyasının vuran qəlbidir. Və bu gün bu qəlb parçalanmış şəkildədir. Yəni qəlbinin bir parçasının şovinist, fanatik və orta əsr feodal təfəkkürlü farsların əlində qalması möhtəşəm sınırlara və coğrafiyaya malik türk dünyası üçün böyük ayıb olardı. O üzdən də bütün türk dünyası Güney Azərbaycan məsələsini öz məsələsi kimi alqılamalıdır. Misal üçün, Özbəkistan düşünməlidir ki, bu, həm də onun problemidir. Yaxud da Qazaxıstan, Türkiyə, Qırğızıstan, Türkmənistan, Quzey Kıbrıs da həmçinin! Ona görə də türk dünyası bu problemlə biurlikdə məşğul olmalıdır!

-Siz tez-tez beynəlxalq tədbirlərdə iştirak edirsiniz. Bu gün dünyanın tanınmış media mərkəzləri İranda 35 milyon Azərbaycan türkünün yaşadığı haqqında bilgilərə sahibdirlərmi?

-Artıq demək olar ki, bəli. Çünki mən 15 ildir ki, beynəlxalq səviyyədə fəaliyyətlərlə məşğulam. Və xatırlayıram ki, bir zamanlar biz Güney Azərbaycan məsələsini ingilisə, fransıza, almana anlatmaq üçün hansı çətinliklərdən keçməli olurduq. İndi isə durum kökündən dəyişib. Bir çox beynəlxalq insan haqları və jurnalist təşkilatları, dövlətlərarası qurumlar artıq birmənalı şəkildə Güney Azərbaycan problemindən xəbərdardır. Eyni zamanda onlar İran əhalisinin ən azı yarısının məhz türklər olduğunu da bilirlər. Hətta bu məsələ Birləşmiş Millətlər Təşkilatı səviyyəsində gündəmdədir və biz də ümid edirik ki, belə gedişlə yaxın illərdə Güney Azərbaycanı düşmən pəncəsindən qurtara biləcəyik. Belədə isə bizə yalnız daha əzmlə çalışmaq qalır!

Söhbətləşdi: Elnur Eltürk