GünAzTv: İranın iç üzü. Beynəlxalq İnsan Haqları Federasiyasının hazırladığı hesabat belə adlanır. Hesabat İranda milli azlıqlara qarşı ayrı-seçkilik siyasətinə aiddir. Təşkilatın vitse-prezidenti Kərim Lahidci deyir ki, İranda çoxlu sayda milli azlıqlar yaşasa da, onların bəziləri ayrı-ayrı vilayətlərin əhalisinin əsas hissəsini təşkil etsə də, sayları, ölkənin hansı regionlarında yaşamaları ilə bağlı rəsmi statistika aparılmır. Bu, ölkədə tabu hesab edilir. Hesabata görə, Azərbaycan türkləri Şərqi Azərbaycan, Qərbi Azərbaycan, Ərdəbil, Kürdistan və Zəncan vilayətlərində yaşayırlar. Tehranda və ölkə boyu digər şəhərlərdə də xeyli Azərbaycan türkü yaşayır. Hesabatda qeyd edilir ki, Azərbaycan türklərinin əsas problemi – mədəni hüquqlarının tapdanmasıdır. Onlar  DİLLƏRİNƏ VƏ MƏDƏNİYYƏTLƏRİNƏ HÖRMƏTSİZLİKDƏN GİLEYLƏNİRLƏR “2006-cı ildə dövlət qəzetlərinin birində çap edilən karikaturada tarakanın Azərbaycan türkcəsində “danışması” İranın şimalında və Tehranın bəzi hissələrində kütləvi etirazlara səbəb olmuşdu. Nümayişlərdə çoxlu sayda həbs edilən, xəsarət alan və ölənlər olmuşdu.O vaxtdan bəri Azərbaycanlı fəallar karikaturanın çapı günündə küçələrə çıxır, milli-mədəni hüquqlarının pozulmasını İran hakimiyyətinə xatırladırlar. Bu aksiyaların qarşısı polis tərəfindən alınır.

2010-cu ilin mayında belə aksiyada 31 nəfər həbs edilmişdi”. Beynəlxalq İnsan Haqları Federasiyasının hazırladığı hesabatda deyilir ki, hər məktəb ilinin əvvəlində - sentyabrın 23-də bir çox Azərbaycanlı tələbələr dərsə getmirlər və bununla öz dillərində - AZƏRBAYCAN TÜRKCƏSİNDƏ TƏHSİL ALMAQ HAQLARININ POZULMASINA DİQQƏT ÇƏKMƏK İSTƏYİRLƏRPolis buna həbslərlə cavab verir. “Azərbaycan türklərinin mədəni hüquqları uğrunda mübarizə aparan fəallar deyir ki, yerli radio və TV kanalları Azərbaycan türkcəsində yetərincə proqramlar vermirlər. Bu tənqidlərə cavab olaraq Zəncan Vilayəti Radio və Televiziyasının rəhbəri demişdi: “Bizim uşaq, yeniyetmə və gənclər üçün yerli dillərdə proqram vermək hüququmuz yoxdur. Bunu etməyimiz üçün Tehran türkcə belə proqramların yayılmasına icazə verməlidir. Onların tövsiyələrinə görə, bizim proqramlarımızın 50 faizi fars dilində olmalıdır”. Azərbaycan fəallar deyirlər ki, İran rəsmiləri türk uşaqlarına öz ana dillərində proqramlara baxmağı qadağan etməklə bu dilin yayılmasının qarşısını almaq istəyirlər. İran hakimiyyəti Azərbaycan türklərinin öz ana dillərinə həsr edilən kütləvi aksiyalarda iştirakına imkan vermir, iştirakçıları həbs edir. Bundan başqa HƏBSLƏR AZƏRBAYCAN TÜRKLƏRİNİN BABƏK QALASINA YÜRÜŞÜ ZAMANI DA BAŞ VERİR Azərbaycan türklərinin mədəni tədbirlərində iştirak etdiyi üçün ordudan kənarlaşdırılanlar da olub.

Azəri türkcəsində çıxan bir sıra mətbu nəşrlər qadağan edilib, o cümlədən “Yarpaq”, “Yaşmaq”, “Şəms-e-Təbriz”, “Varavi” və s. 2007-ci ildə həbs edilən jurnalist Səid Mətinpur bağlı qapılar arxasında, vəkilsiz 8 il müddətinə azadlıqdan məhrum edilib. Onu “xaricilərlə əlaqədə və “İslam sisteminə qarşı təbliğatda” təqsirli biliblər. O həm də Azərbaycan türklərinin mədəni hüquqları, onların öz dillərində mətbuata malik olması uğrunda mübarizə aparırdı”. Beynəlxalq İnsan Haqları Federasiyası milli ayrı-seçkiliyə son qoyulması üçün İran hökumətinə - Konstitusiyaya müvafiq dəyişikliklərin edilməsini təklif edir. Beynəlxalq İnsan Haqları Federasiyası 1922-ci ildə yaradılan qeyri-hökumət təşkilatıdır – mərkəzu katibliyi Parisdə yerləşir, 100-dən çox ölkədə nümayəndəsi var.  Azadlıq radiosu