GünAzTv: İranın xarici işlər naziri Manuçehr Mottəki açıqlama verib ki, Tehran qonşu ölkələrlə vətəndaşları ilə viza rejimini ləğvini planlaşdırır. O bildirib ki, bu addım İranın qonşu ölkələrlə qarşılıqlı fəaliyyətini və əlaqələrini fəallaşdırmağa imkan verəcək. Mottəki deyib ki, İran artıq Azərbaycan vətəndaşları üçün viza rejimini ləğv edib və yaxın vaxtlarda Bakının cavab addımı atacağını gözləyir. Onun sözlərinə görə, yaxın gələcəkdə İran və Gürcüstan da hər iki ölkənin vətəndaşları üçün viza rejimini aradan qaldırmağı planlaşdırır. İran vətəndaşlarına 43 ölkəyə vizasız gedişə icazə veriləcəyi gözlənilir. Mottəkinin İran prezidenti Mahmud Əhmədinejadın Azərbaycana gözlənilən səfəri ərəfəsində bu məsələni qaldırması təsadüfi sayıla bilməz. Çox güman ki, ikitərəfli danışıqlar zamanı İranın qaldırdığı əsas məsələlərdən biri rəsmi Bakı tərəfindən viza rejiminin ləğvi olacaq. Ancaq Azərbaycanın bu təklifə hələlik müsbət cavab verəcəyi inandırıcı görünmür. Ona görə ki, Azərbaycanın Xarici İşlər Nazirliyi viza məsələsinə konkret aydınlıq gətirdi və bildirdi ki, Ermənistanla münaqişə aradan qalxmadan bu mümkün deyil. Miqrantlara Hüquqi Yardım Mərkəzinin rəhbəri Əlövsət Əliyevə görə viza rejiminin ləğvinə dair İranın təklifini qəbul etmək düzgün olmaz: "Azərbaycan Qərbə inteqrasiya edən dövlətdir və Azərbaycan maraqladır ki, onun vətəndaşları Qərbi Avropa ölkələrinə sadələşdirilmiş qaydada gedə bilsinlər. Ona görə İran vətəndaşlarının vizasız Azərbaycan ərazisinə gəlməsi bu prinsipin ziddinədir. İranda kifayət qədər terrorçu təşkilatların yerləşdirilməsinə dair məlumatlar mövcuddur. Bu səbəbdən də İran vətəndaşlarının Azərbaycana sadələşdirilmiş qaydada gəlməsi müvafiq deyil. Dövlət öz qərarında sərbstdir və istədiyi qərarı qəbul edə bilər. Amma mən düşünürəm ki, İranla Azərbaycan Respublikası arasında viza rejiminin birtərəfli qaydada saxlanılması ölkəmiz üçün daha əlverişlidir. Bu yalnız Azərbaycanın Ermənistanla müharibə şəraitində olması ilə bağlı deyil. Həm də onunla əlaqədardır ki, İranda bizim soydaşlarımıza ayrıseçkilik hökm sürür, İran qeyri-demokratik, insan hüquqlarının təmin olunmadığı bir dövlətdir. Azərbaycana gətirilən narkotik vasitələrin 99 faizi tranzit ölkə kimi istifadə olunmaqla İrandan qeyri-qanuni idxal olunur. Azərbaycan İranla viza rejimini ləğv edə bilməz, bu Azərbaycanın təhlükəsizliyi baxımından da məqsədəmüvafiq deyil. Əgər Türkiyə vətəndaşlarının Azərbaycana vizasız gəlməsi təmin edilmirsə, o halda İran haqqında bunu düşünmək hələ çox tezdir". Əlövsət Əliyevin sözlərinə görə, İran öz vətəndaşlarının Azərbaycana vizasız gəlişini təmin etməklə, missionerlərin ölkəmizə asan daxil olmasına şərait yaratmaq istəyir: "İran ilk növbədə, özünü demokratik ölkə kimi göstərmək istəyir. Tehran düşünür ki, birtərəfli vizanın mövcud olması İranın imicinə zərbədir. Hər bir dövlət maraqlıdır ki, onun vətəndaşları qonşu ölkələrə sərbəst gedib-gələ bilsinlər. Bu da ölkə iqtisadiyyatının yüksəlməsinə xidmət edən bir normadır. Bu gün Azərbaycanda səhiyyə xidməti aşağı səviyyədə olduğuna görə Azərbaycan vətəndaşlarının 40 faizi İranın səhiyyə orqanlarının xidmətindən istifadə edir. Yaxud sərhəddə 45 kilometrlik ərazidə yaşayanlar da gündəlik bazarlıqlarını gedib İranda edib gəlirlər. O cümlədən, ziyarətgahlara sərbəst gedib- gəlirlər. İran Azərbaycanın müəyyən regionlarını dini təsir altında saxlaya bilir. İran bununla Azərbaycanda missionerlik fəaliyyətini həyata keçirmək, islam inqilabı "ixrac etmək" istəyir". Xalq cəbhəsi qəzeti