GünAzTv: ABŞ (Amerika Birləşmiş Ştatları) xüsusi xidmət orqanları uzun müddətdir misli görünməmiş maxinasiyalar həyata keçirərək dövlətə böyük məbləğdə ziyan vuran mütəşəkkil cinayətkar qruplaşmanı ifşa edib.

Amerika mətbuatının yazdığına görə, keçmiş Bakı ermənisinin başçılıq etdiyi mafiya hökumətə tibbi sığorta proqramı çərçivəsində 160 milyon dollar ziyan vurmaqda ittiham olunur. Lakin bu hələ son rəqəm deyil və istintaq dövlətə dəyən ziyanın arta biləcəyini istisna etmir. Cinayətkarlar pulu hökumətdən mövcud olmayan 100-dən çox tibbi klinikanı idarə etməklə, saxta müraciətlər göndərməklə və digər fırıldaq üsulları ilə qoparıblar.

Federal Təhqiqatlar Bürosu mafiyanın 44 üzvünün saxlanıldığını açıqlayıb. İşi aparan federal prokuror Prit Bharara Nyu Yorkda  keçirdiyi mətbuat konfransında deyib ki, qruplaşma hədə-qorxu, zorakılıq metodlarından istifadə edib, “klassik mafiya üslubunda” işləyib. Banda yaradıcılarının - 35 yaşlı Davit Mirzoyan və 36 yaşlı Robert Tercanyanın şərəfinə “Mirzoyan-Tercanyan qruplaşması” adlandırılır. Lakin mafiyanın “xaç atası” 46 yaşlı keçmiş Bakı ermənisi, ittiham sənədlərində “vor zakon” kimi göstərilən Armen Kazaryandır. Kazaryan 1996-cı ildə ABŞ-a köçüb, tez-tez Ermənistan və Azərbaycana səfər etməsinə baxmayaraq, qaçqın statusu alıb. “Bu təşkilatın əli ölkədən kənara, bizim sahillərdən kənara da çatıb. Gəliri, coğrafi miqyası və ambisiyaları baxımından bu beynəlxalq mütəşəkkil qrup istənilən ənənəvi mafiya ailəsinə rəqib ola bilərdi” deyə, Bharara bildirib. İttiham aktına görə amerikan-erməni kriminal qrupu Los-Ancelesdə və Nyu Yorkda fəaliyyət göstərib, lakin 25 ştatda soyğunçuluq, kredit kartı, immiqrasiya fırıldağı, qaçaqmal siqaretlərin, oğurluq “Viaqra”nın yayılması ilə məşğul olub. İttihamnaməyə görə, təşkilat üzvlərindən çoxu milliyyətcə erməni, yaxud Ermənistanla köklü əlaqələri olan mühacirlərdir. Bu ölkəyə tez-tez baş çəkən cinayətkarlar orda daşınmaz əmlak alıblar, qanunsuz gəlirləri hesabına biznes qurublar, cinayətkar aləmlə əlaqələr yaradıblar. İttihamnamə isə əsl triller janrındadır. Banda barədə hay-küylü detallar, üzvlərinin dəbdəbəli həyat tərzi, bahalı maşınları, Las Veqas kazinolarında “pulyuma” və digər faktlar sənəddə yer alır. Amerika xəfiyyələri bandanı uzun müddət izlədikdən sonra onun üzvlərinin həbsi üçün əməliyyat keçiriblər. Prokuror P.Bharara deyib ki, bu ittihamnamə əsasında böyük film çəkmək olar. Ancaq bunlar kino deyil, müstəntiqlər ittiham olunan beynəlxalq qanqsterlər barədə hər detalı araşdırırlar. Nyu York Şəhər Polisindən Reymond Kelli isə deyib ki, cinayətkarlar öz bizneslərini çox uğurlu qurublar: “Xeyli bədxərc fırıldaq sxemi olsa da, onlar bunun öhdəsindən az resursla necə gəliblər, inanmaq olmur. Bütün əməliyyatları Bruklində kiçik bir ofisdən aparıblar. Qalina Vovk adlı bir qadın bütün günü səhər tezdən gecəyə qədər orda oturub, saxta tibbi iddiaları hazırlayıb”. Qalina Vovk təşkilatın əsas liderlərindən biri - Robert Tercanyanın arvadıdır. İttiham aktından məlum olur ki, mafiya üzvləri Amerikada yaşlılara tibbi yardım göstərilməsini nəzərdə tutan dövlət proqramından faydalanıblar. Mafiya Amerikanın 25 ştatında 118 saxta klinika “açıb”, bu klinikaların adından guya yaşlı Amerika vətəndaşlarına tibbi xidmət göstərildiyinə dair saxta hesablar göndərilib. FBİ rəsmisi Cenis Fedarçik deyib ki, bu sistem tamamilə virtual fəaliyyət göstərib və mafiyanın nəzarətində olan “klinika” ların nə həkimləri, nə real pasiyentləri mövcud olmayıb.Federal prokuror P.Bharara deyib ki, mafiyanın Ermənistanla sıx əlaqələri olub, onun rəhbərləri müntəzəm olaraq bu ölkəyə gediblər və orada özlərinə daşınmaz əmlak alıblar. Mafiya lideri A.Kazaryan isə “Pzo” və ya “Qerop” ləqəbləri ilə tanınıb. Onun hələ sovet dövründə Bakıda yaşayarkən kriminal fəaliyyət göstərdiyi və cinayətkar aləmdə nüfuza malik olduğu bildirilir. SSRİ-nin dağılmasından sonra isə  ABŞ-a mühacirət edib və orada öz mafiyasını qurub. Onun mafiyası klassik “Koza Nostra” stilində fəaliyyət göstərib. “Kriminalnaya Rossiya” internet portalı isə xəbər verir ki, Kazaryan ötən il aprelin 7-də növbəti dəfə Ermənistana gələrkən İrəvanda həbs edilib. Lakin qısa müddət sonra azadlığa buraxılıb.Kazaryanın Bakı ilə əlaqələri barədə Amerika hüquq-mühafizə orqanları detalları göstərmir. Lakin qəzetimizin əməkdaşı bu mafiyanın ifşa olunması kontekstində maraqlı görünən bir detalı xatırlayır. Həmin əməkdaşımız bir neçə il əvvəl Dövlət Departamentinin proqramı çərçivəsində ABŞ-da səfərdə olub. Nyu Yorkdan Londona uçarkən təyyarədə əslən bakılı olan sərnişin söhbət zamanı danışıb ki, uzun müddətdir Bruklində yaşayır və Amerikada yaşlılara tibbi xidmət təşkil edən  hansısa firmada işləyərək böyük pullar qazanır. Həmin sərnişin danışırmış ki, Amerikada oturduğun yerdə pul qazanmaq çox asandır: “Bu ölkədə pulları sanki küçəyə səpələyiblər, sadəcə bir az fərasət lazımdır ki, yığışdırasan”. Qeyd edək ki, bu detal sözügedən mafiyanın fəaliyyətinə dair məlumatlar fonunda maraqlı görünə bilər.Beynəlxalq kriminal qruplaşmaların Azərbaycanla əlaqələrinə dair bu fakt yeni deyil. Məsələn, bu yaxınlarda sui-qəsd nəticəsində yaralanan məşhur avtoritet “Ded Xasan”ın da dəfələrlə Bakıda olmasına dair məlumatlar var. Rusiya mediası onun Azərbaycanda biznesinin olduğunu da yazır. Yeni musavat