GünAzTv: Qırğızıstanda keçirilmiş parlament seçkisinin ilkin nəticələrinə görə, müxalifət önə çıxıb. Hazırda öndə gedən müxalifətçi «Ata-Jurt» partiyasının siyahısında bir müddət əvvəl devrilmiş prezident Kurmanbek Bakiyevin hökumətində yüksək postlar tutmuş şəxslər yer alıb.

«Səslərin 80,11 faizinin hesablanmasından sonra «Ata-Jurt» partiyası səslərin daha çoxunu qazanıb» - deyə Mərkəzi Seçki Komissiyasından bildiriblər. İkinci yerdə müvəqqəti hökumətdə baş nazirin müavini olmuş Almazbek Atambayevin Sosial-Demokrat Partiyası, üçüncü pillədə isə biznesmen Omurbek Babanovun liderlik etdiyi «Respublika» partiyası gəlir. Seçkidə səsvermə hüququna malik vətəndaşların 56 faizi iştirak edib. 120 deputat kürsüsü uğrunda 29 partiya mübarizə aparıb. Prezident Roza Otunbayeva parlament seçkilərinin həlledici olduğunu deyib. Qırğızıstan lideri xalqa müraciətində bildirib ki, seçkilər xalqın və ölkənin gələcəyi üçün həlledicidir: «Biz yalnız parlament seçmirik. Biz yeni parlament respublikası sistemini qururuq». Əvvəldən də əksər ekspertlər tərəfindən bu seçkilər sıradan bir seçki hesab edilmirdi. Mərkəzi Asiyada ilk dəfə olaraq parlament respublikası qurulur. İyunda Konstitusiya dəyişikliyi ilə bağlı referendumdan sonra Qırğızıstanda prezidentin səlahiyyətləri azaldılıb, ölkəni parlament seçkilərində ən çox səs qazanacaq partiyalar idarə edəcəklər. Seçkidə nə az, nə çox - 29 partiya iştirak edib. Beləliklə, parlament seçkilərindən sonra yeni hökumət qurulacaq və indi prezident səlahiyyətlərini müvəqqəti icra edən Roza Otunbayeva daha çox formal fiqur olacaq. Bişkekdə jurnalistlərə açıqlama verən ATƏT-in Demokratik Təsisatlar və İnsan Haqları Bürosunun sözçüsü seçki kampaniyasını tərifləyib. Onun sözlərinə görə, kampaniya “çox canlı, rəqabətli keçib. Partiyalar ölkə boyu kütləvi aksiyalar keçirirlər. Böyük partiyalar azad şəkildə kampaniya aparıblar və elə bir ciddi insident baş verməyib”. Cenevrədə yaşayan qırğız jurnalist Çolpon Orozobekova isə hesab edir ki, indi Qırğızıstanda Asiyada ilk dəfə olaraq parlament respublikasının qurulmasına ən çox Rusiya mane ola bilər, bir də Mərkəzi Asiya liderləri. Orozobekova deyir ki, Rusiyanın avtoritar rəhbərliyi və Mərkəzi Asiya rəhbərləri onların sərhədlərinə yaxın yerdə xalqın səsilə formalaşan parlament respublikasının qurulmasını istəmirlər: "Əgər Rusiya bu ilin əvvəli prezident Bakiyevin hakimiyyətinin devrilməsini dəstəkləmişdisə, indi Kremli yalnız bir avtoritar lideri başqa birisinin əvəzləməsi maraqlandırır. Hətta Rusiya prezidenti Dmitri Medvedyev deyib ki, parlament sisteminə keçid Qırğızıstanda fəlakətlə nəticələnə bilər". Çolpon Orozobekova hesab edir ki, Rusiya prezidentinin bu sözləri təkcə siyasi səhv yox, həm də qırğız xalqının təhqir olunması idi. Orozobekova düşünür ki, Kremldən fərqli olaraq ABŞ Qırğızıstanda məhz demokratik respublikanın qurulmasına çalışır. Təsadüfi deyil ki, parlament seçkilərinin keçirilməsi üçün Vaşinqton Qırğızıstana 5 milyon dollar yardım ayırıb. ABŞ prezidenti Obama Otunbayevanı Ağ evdə qəbul edib və ölkədə demokratik sistemin bərqərar olmasında köməyini əsirgəməyəcəyini deyib: "Əgər əvvəl Amerika Bakiyev hakimiyyətini dəstəkləyib, onun ölkədə insan haqlarını pozmasına göz yumurdusa, demokratiyanı Manas aeroportuna və oradan Əfqanıstana yük daşınması icazəsinə qurban verirdisə, indi vəziyyət dəyişib”. Orozobekova deyir ki, ola bilər bu seçkilərdə nöqsanlar olsun, amma seçkinin uğuru da, qüsurları da qırğız xalqının olacaq: "Əsas odur ki, ilk dəfə olaraq Orta Asiyada bir nəfərin iradəsi ilə yox, parlament vasitəsilə idarə edilən sistem qurulacaq".