GünAzTv: Fars rejimi milli fəallara qarşı təzyiqlərini sərtləşdirir. Soydaşlarımız aylarla həbsdə saxlanılır, onlara ağır işgəncələr verilir.2010-cu il 22 may aksiyası və 1 iyun Bəzz qalasına yürüş ərəfəsində həbs edilən azərbaycanlı siyasi məhbuslar aclıq aksiyasına başlamaq qərarına gəliblər. Hazırda Təbriz mərkəzi həbsxanasında və "Ettelaat"ın təcridxanasında saxlanılan 14 azərbaycanlı siyasi məhbus 5 aya yaxındır naməlum səbəbdən azadlıqdan məhrum ediliblər. Onlar hüquqi vəziyyətlərinə aydınlıq gətirilmədiyi təqdirdə aclıq aksiyasına başlayacaqlarını deyiblər. Təhlükəsizlik yetkililəri və Təbriz İnqilab Məhkəməsinin hakimi sözügedən məhbusların mühakimə olunması və ya onların mülki vəsiqə qarşılığında azadlığa buraxılması üçün ünvanlanan müraciətlərə heç bir cavab vermir. Xatırladaq ki, tutulanlar arasında Yürüş Mehrəlibəyli (Ayət) ən çox işgəncəyə məruz qalan soydaşımızdır. Hətta ona mənəvi təzyiq göstərmək üçün yoldaşını (Zəhra Fərəczadə (Sona)) və baldızını Həmidə Fərəczadə (Pinar)) da həbs ediblər. Bundan əlavə, milli fəala valideynlərilə görüş imkanı vermirlər, onu vəkil tutmaq hüququndan məhrum ediblər. Hüseyn Nəsiri xəstəxanaya köçürülübHazırda heç bir məhkəmə prosesi keçirilmədən qeyri-qanuni olaraq həbsdə saxlanılan azərbaycanlı milli-mədəni fəal Hüseyn Nəsiriyə Təbrizin Şəhid Mədəni Xəstəxanasında rast gəlinib. Belə ki, xəstəxanadakı xəstələrdən biri qışqıraraq Hüseyn Nəsiri olduğunu deyib: "Məni zindandan gətiriblər, "Ettelaat" əməkdaşlarının ağır işgəncələri altında ürək damarlarım tutulub və səhhətimlə bağlı vəziyyətim olduqca ağırdır. Məni eşidənlərdən səsimi fikirdaşlarıma çatdırmalarını xahiş edirəm". Bu barədə məlumatı xəstəxanadakı bir ailə çatdırıb. Onun sözlərinə görə, Hüseyn Nəsiri 4 əsgərin əhatəsində olub. Xatırladaq ki, Azərbaycanın milli kimliyi uğrunda dinc fəaliyyət aparan Hüseyn Nəsirini 2010-cu il aprelin 2-də Urmu gölünün qurudulması prosesinin qarşısının alınmasıyla bağlı keçirilmiş aksiyada iştirak etdiyinə görə İran təhlükəsizlik qüvvələri tutub və indiyədək naməlum səbəbdən həbsdə saxlayırlar. Azərbaycanlı fəal bundan öncə də dəfələrlə təzyiqlərə məruz qalıb və barəsində həbs cəzası çıxarılıb."Babək Xürrəmdin" 15 il azadlıqdan məhrum olunubİran məhkəməsi "Babək Xürrəmdin" ləqəbilə tanınan vebloqçu soydaşımız Hüseyn Ronəqi Məlekini 15 il azadlıqdan məhrum edib. Onun anası Züleyxa Musəvi bildirib ki, milli fəalın hökmünü sentyabrın 26-da elan etməliydilər: "Ancaq sonra hökmün oktyabrın 3-də elan olunacağını dedilər. Həmin gün isə Hüseyni bizim və vəkilinin xəbəri olmadan məhkəməyə gətiriblər və bizə onunla görüşmək icazəsi verilmədən hökm barədə ona məlumat veriblər". Onun sözlərinə görə, hökmü məhkəmənin katibi Hüseyn Ronəqi Məlekiyə elan edib. Onun özü məhkəmə hökmünü görməyib, sadəcə ona barəsində 15 il həbs cəzasına dair hökm çıxarıldığı deyilib. Xatırladaq ki, Hüseyn Ronəqi Məleki 2009-cu il dekabrın 13-də tutulub və "Sepah"ın təkadamlıq kamerasına salınıb. O, saxlanıldığı on ay müddətində televiziyada müsahibə verərək yalançı etiraf etsin deyə ağır cismi və ruhi işgəncələrə məruz qalıb. Urmu zindanında məhbus özünü asıbBeş ildir Urmu zindanında saxlanılan və edama məhkum olunmuş məhbus Bəhram Kəbiri oktyabrın 5-dən 6-na keçən gecə özünü asıb. Həbsxana məmurları məhbusun ölüm hökmünü icra etmək üçün iki gün əvvəl onu karantin bölməsinə köçürübmüşlər. Son 6 ayda İranda 139 nəfər müxtəlif cinayətlərdə günahlandırılaraq dar ağacından asılıb. Çıxardığı ölüm hökmlərinin sayına görə, İran dünyada ikinci yeri tutur. Birinci yer Çinə məxsusdur.Səid Muradi ali təhsilini davam etdirə bilmədiSulduz universitetlərinin Qəbul Heyəti Təşkilatı azərbaycanlı tələbə fəal Səid Muradiyə ali təhsilini davam etdirməyə icazə verməyib. Qərara əsasən, Gilan Universitetinin hüquq üzrə bakalavr pilləsində qalmalıdır. Qeyd edək ki, Səid Muradi "Qopuz" dərgisinin baş redaktoru, "Çağrı" dərgisinin şura üzvü, Şəhriyar və islami qurumunun məsulu və 2009-cu ildəki prezident seçkilərinin fəallarından biri olub. Onun təhsilinə qoyulan qadağa da məhz bu fəaliyyətlərilə bağlıdır. Tələbə fəal İran parlamentinin millət vəkillərinə də məktub yazaraq vəziyyəti onlara bildirib. Ancaq onun müraciətlərinə cavab verilməyib.Təbriz və Urmu qırmızı rəngə boyanırOktyabrın 4-də Güney Azərbaycanın başkəndi Təbriz və ən böyük şəhərlərdən biri olan Urmuda soydaşlarımız divarları, binaların qapılarını, pilləkənlərini, damlarını milli simvol kimi qəbul edilmiş qırmızı rəngə boyayıblar. Həmin gün Urmu şəhərində Xəyyam xiyabanı bütövlükdə qırmızıya bürünüb. Qeyd edək ki, Güney Azərbaycanın digər şəhərlərində də bununla bağlı tədbirlər keçirilir. "GünAzPort" Azərbaycan türkcəsində bölmə yaradıb"Güney Azərbaycan Portalı" (GünAzPort) internet saytı öz fəaliyyətini genişləndirmək istiqamətində yeni bir addım atıb. Gündən-günə maraqlı xəbərlər və məqalələrilə diqqət çəkən "GünAzPort" Azərbaycan türkcəsində bölmə yaradıb. Yeni bölməyə daxil olmaq üçün "GünAzPort" internet saytının əsas səhifəsində "Türkcə" bölməsinə vurmaq lazımdır. Yeni açılmış "Türkcə" bölməni http://www.gunazport.com/turkce/ linkindən izləmək mümkündür. İnanırıq ki, bu addım "GünAzPort" internet saytını daha irəlilərə daşıyıb və onun fəaliyyəinin inkişafı uğrunda yeni bir başlanğıc olacaq. "Təbriz səsi" fəaliyyətini bərpa etdiGüney Azərbaycanın fəal internet saytlarından biri sayılan "Təbriz səsi" dörd aylıq fasilədən sonra öz fəaliyyətini yenidən bərpa edib. "Təbriz səsi" fəaliyyət göstərdiyi müddətdə Güney Azərbaycanla bağlı etibarli xəbər mənbələrindən biri olub. Ümid edirik ki, müəyyən səbəblərdən dörd ay müddətinə öz fəaliyyətlərini dayandıran internet saytının bütün problemləri geridə qalıb və keçmişdəki kimi Azərbaycanımızın informasiya blokadasını sındırmaq uğrunda öz töhfəsini verəcək. Vebsəhifənin adresi isə www.tebrizsesi.com -dur. Təbrizin "Bələdiyyə" komandası cəzalandırıldıİran Futbol Federasiyası İnzibati Komitəsinin Təbrizin "Bələdiyyə" ("Şəhrdari") futbol komandası haqqındakı qərarı bəlli olub. Qurumun rəisi Müctaba Şərifi bildirib ki, İran superliqasında çıxış edən Təbrizin "Bələdiyyə" komandasının azarkeşlərinin yol verdiyi qanunsuz hərəkətlərə görə klub 10 min ABŞ dolları (10 milyon tümən) cərimə ödəməlidir. Eyni zamanda azarkeşlər 6 ay müddətinə şərti olaraq komandanın yarışlarını izləməkdən məhrum ediliblər. Sadəcə, azarkeşlər ən kiçik xətaya yol verərsə, bu cəza tətbiq olunacaq. Müctaba Şərifi deyib ki, "Bələdiyyə" komandasının rəhbərliyi klubun yalnız 1500 rəsmi azarkeşi olduğunu və Təbrizdə keçirilən ev oyunlarında yalnız onlara bilet satılmasını məsləhət görüb. Yəni komandanın fanklubuna üzv olan həmin azarkeşlər vəsiqəsini göstərərək stadiona daxil ola bilərlər."Dumanlı Təbriz" serialı çəkilirİranda ötən əsrlərdə İran-Rusiya münasibətlərini özündə əks etdirən, Azərbaycanın tanınmış dramaturqu Məmməd Səid Ordubadinin "Dumanlı Təbriz" romanı əsasında serial çəkilir. Serial "Dumanlı Təbriz" adlanır. Filmin ssenari müəllifi və rejissoru Məhəmmədrza Vərzidir. Serialın çəkilişləri üçün lazımi dekorasiya qurulub. Dekorasiyada əsasən Təbrizin hökumət evi (Darül-hökumət), Abbas Mirzənın sarayı, Təbriz şəhərinin mərkəzi meydanı, şəhərin giriş qapısı, Came məscidi, bir neçə mənzil əks olunub. İndiyədək serial çəkilişlərinin 30 faizi başa çatıb. Serialda İranın tanınmış aktyorları Cəmşid Məşayixi, Məhəmməd Müti, Məhəmmədrza Şərifiniya, İlham Həmidi, Daryuş Kardan, Çingiz Vusuqi, Leyla Zarezadə və başqaları rol alıb. Serial 2011-ci ilin fevralından efirə çıxacaq. 20 seriyalı (hər seriyası 50 dəqiqə) film İran və Rusiya arasında baş vermiş müharibə və tarixi hadisələri əhatə edir. Xalq Cəbhəsi