GünAzTv: Ermənistanla Türkiyə arasında sərhəd açılımı və ikitərəfli münasibətlərlə bağlı danışıqlar yenidən gündəmə gələ bilər. Türkiyənin «Sabah» qəzetinin yazdığına görə, dekabrın əvvəlində Ermənistan və Türkiyə prezidentləri Serj Sarkisyan və Abdulla Gül Astanada ATƏT-in sammiti çərçivəsində görüş keçirəcəklər. Bu xəbərin yayılması ilə eyni vaxtda Ermənistanla protokol prosesini dəyərləndirən Türkiyənin xarici işlər naziri Əhməd Davudoğlu bildirib ki, “Türkiyə ilə Ermənistan arasındakı proses heç bir zaman bitməyib”. Türkiyənin XİN rəhbəri qeyd edib ki, bu proses Qafqaz regionunda sülh bərqərar olunanadək davam edəcək. Yayılan məlumatlara görə, İsveçrənin Xarici İşlər Nazirliyi Türkiyə-Ermənistan sərhədlərinin açılmasını nəzərdə tutan Sürix protokollarının reallaşdırılması istiqamətində yenidən fəaliyyətə başlayıb. Türkiyənin “Hüriyyət” qəzetinin verdiyi məlumata görə, bununla bağlı İsveçrə diplomatları Türkiyə və Ermənistandan olan həmkarları ilə telefon söhbəti aparıblar. Bu proses artıq “ikinci Sürix» də adlandırılıb. Lakin Ankaradakı müşahidəçilər mövcud şəraitdə Türkiyə-Ermənistan sərhədlərinin açılması üçün göstərilən səylərin uğurlu olacağına inanmadıqlarını bildirirlər. Onların fikrincə, indi Ankara Azərbaycanın mənafelərini əvvəlki dövrlə müqayisədə daha çox nəzərə almalıdır. Qəzetin diplomatik mənbələrə istinadən verdiyi məlumata əsasən, Türkiyənin xarici siyasət idarəsinin nümayəndələri bildiriblər ki, Ankaranın mövqeyində məsələ ilə bağlı problem yoxdur. Lakin prosesi donduran Ermənistan tərəfi olduğu üçün danışıqların bərpası üçün ilk addımı da Yerevan atmalıdır. Türk diplomatlar xoş məramlı təşəbbüslərə Ankaranın qapısının hər zaman açıq olduğunu bildiriblər. Artıq Türkiyə ilə Ermənistan arasında son günlər yenidən alovlanan sərhəd açılımı məsələsinə hər gün yeni münasibətlər ortaya çıxır. Türkiyəli biznesmenlər iki ölkə arasında ticarət əlaqələrinin genişlənməsinin sərhədlərin açılmasına müsbət təsir edəcəyini bəyan etməyə başlayıblar. Bu barədə açıqlamanı Türkiyənin Van əyalətinin Sənaye və Ticarət Palatası Şurasının üzvü Ayxan Fidan verib. Onun sözlərinə görə Ermənistan Van vilayətindən kafel və apelsin ixrac edəcək. A.Fidanın fikrincə, bu, sərhədlərin açılması istiqamətində ilk addım ola bilər. «Ticarət əlaqələrini nə qədər tez yoluna qoysaq, o qədər tez də sərhədləri aça bilərik» - A.Fidan belə bildirib. Hələlik kafel Ermənistana Gürcüstan vasitəsi ilə gətiriləcək. Bu isə öz növbəsində qiymətlərdə müəyyən artımla müşahidə ediləcək. A.Fidan Ermənistanla sərhəd açılımının ermənilərə daha sərfəli olduğunu bildirib: “Ermənistanın əhalisi 3,5 milyon, Türkiyəninki isə 75 milyondur. Sərhədlərin açılması erməni biznesmenləri üçün bazarda geniş imkanlar yaradacaq”.Yeri gəlmişkən, Türkiyədə gələn il keçiriləcək parlament seçkilərinin vaxtı məlum olub. Baş nazir Rəcəb Tayyib Ərdoğan seçkiləri iyun ayının ilk həftəsində keçirməyi planlaşdırdıqlarını bildirib. Lideri olduğu AK Partiyanın İstanbul təşkilatının toplantısında çıxış edən Ərdoğan bildirib ki, mart ayına qədər bütün ilkin hazırlıqlar başa çatmalıdır. Baş nazir qeyd edib ki, mart ayının əvvəlindən etibarən partiya öz namizədlərini müəyyənləşdirməyə başlayacaq. Lakin siyasi müşahidəçilər hesab edirlər ki, seçkiqabağı kampaniya qeyri-rəsmi də olsa artıq başlayıb. Müxalifətdəki Milliyyətçi Hərəkat Partiyasının lideri Dövlət Baxçalının ötən həftə Türkiyənin Ermənistanla sərhəd bölgələrinə getməsi məhz bu kampaniyanın startı kimi qiymətləndirilib. Baxçalı partiya fəalları ilə birlikdə Ermənistanla sərhəddəki Ani məscidində cümə namazı qılıb. Dövlət Baxçalının bunun üçün Anadolunun türklər tərəfindən fəthinin başlanğıcını simvolizə edən və 936 il əvvəl kilsədən məscidə çevrilən ibadətgahı seçməsi ölkədə kifayət qədər ciddi rezonans yaradıb. Hakimiyyətin Ermənistanla yaxınlaşma siyasətinin Azərbaycanı küsdürdüyünü bəyan edən Baxçalı Yerevanı bölgədə sülhün yaranmasını əngəlləməkdə ittiham edib. Dövlət Baxçalı və partiya fəalları sərhəd bölgəsində “canlı sədd” yaradaraq, Türkiyə-Ermənistan sərhədlərinin açılmaması ilə bağlı mövqelərinin qəti olduğunu nümayiş etdiriblər. Hakimiyyət nümayəndələri isə Baxçalının hərəkətlərini şou yaratmaq cəhdi kimi qiymətləndiriblər.