Ekvador xaos içində

SON XƏBƏRLƏR

Ekvador xaos içində

2021.10.20, 07:36

Gunaz.tv

GünAzTv: Ekvadorda prezident Rafael Korrea etirazçı polislərin mühasirədə saxladığı bir xəstəxanadan ordu birləşmələrinin müdaxiləsi ilə xilas edilib.

Cənubi Amerika ölkəsinin prezidenti Korrea hökumətin apardığı ixtisarlara etiraz edən polislərin nümayişində gözyaşardıcı qazdan zərər görmüş və müalicə üçün aparıldığı xəstəxanada polis tərəfindən mühasirəyə alınmışdı. Korrea xilas olduqdan sonra Prezident Sarayından onu dəstəkləmək üzrə küçələrə çıxan nümayişçilərə müraciət edib və ölkədə onu devirmək istəyən qüvvələrin olduğunu bildirib. Polisi də xəyanətdə ittiham edən Korrea həmçinin xilasedici əməliyyat zamanı ən azı bir nəfərin öldüyünü və buna görə kədərləndiyini dilə gətirib.

Prezident onu dəstəkləmək üzrə küçələrə çıxanların bu hərəkətlə «vətəndaşların inqilabını seçkilərdən kənarda dayandırmağa çalışanlara bir dərs verdiklərini» bildirib. Ordu və prezidentə sadiq xüsusi polis birləşmələrinin həyata keçirdiyi xilasetmə əməliyyatı zamanı intensiv silah səsləri eşidilsə də, ölən və yaralananların sayı barədə dəqiq rəqəm açıqlanmayıb. Prezident xilas edildikdən sonra əsgərlərin təhlükəsizlik qüvvələri mərkəzlərinə basqınlar təşkil etdiyi bildirilir. Ordu birləşmələrinin əməliyyatı ərəfəsində Korrea müxalifəti və təhlükəsizlik qüvvələrinin bir qisimini çevriliş cəhdində ittiham etmiş və ardından hərbi vəziyyət elan etmişdi. Hərbi vəziyyətin elan edilməsindən əvvəl həmçinin hava qüvvələri heyətinin də paytaxtda etiraz aksiyası baş vermişdi. Hava qüvvələrinə məxsus əsgərlər hərəkətlərini məmurların mükafat sistemində dəyişikliklərə getməsinə etiraz edən minlərlə polislə həmrəylik üçün təşkil etdiklərini açıqlamışdılar.

Ekvadorda yaşananlarla əlaqədar açıqlama verən Boliviya prezidenti Evo Morales çevriliş cəhdi olaraq xarakterizə etdiyi hadisələrin arxasında Amerika Birləşmiş Ştatlarının dayandığını bəyan edib. ABŞ (Amerika Birləşmiş Ştatları) isə Amerika Dövlətləri Təşkilatının yığıncağında Ekvadorda yer alan proseslərdən narahatlıq duyduğunu və hökuməti dəstəklədiyini açıqlamışdı. Bu arada Kolombiya və Peru Ekvadorla sərhədlərini bağlayıb və Venesuela prezidenti Huqo Çavez həmkarı Korreanın böyük təhlükə altında olduğunu söyləyib. Avropa Birliyinin xarici siyasət nümayəndəsi Ketrin Eşton da tərəfləri sakitliyə çağırıb və Ekvador hökumətini dəstəklədiklərini ifadə edib. Bizim yol

GUNAZ.TV

SON XƏBƏRLƏR