GünAzTv: Ə. Davutoğlu çıxışında əsasən Türkiyə-Ermənistan münasibətləri və Qafqazdakı vəziyyətdən danışıb.

BMT Baş Assambleyasının 65-ci sessiyasına qatılmaq məqsədilə ABŞ-da (Amerika Birləşmiş Ştatları) olan Türkiyənin xarici işlər naziri Əhməd Davutoğlu Harvard Universitetinin Con Kennedi məktəbində 200-dən çox elm adamı və tələbənin qarşısında çıxış edib.

”Cihan” agentliyinin verdiyi məlumata görə, Ə. Davutoğlu çıxışında əsasən Türkiyə-Ermənistan münasibətləri və Qafqazdakı vəziyyətdən danışıb. Nazir 2007-ci ildə İsveçrədə Ermənistanla dialoqa başladıqlarını və 2009-cu ildə protokol imzaladıqlarını söyləyib. O, təkcə Türkiyə ilə Ermənistan arasında deyil, dünyanın hər yerində türklər və ermənilər arasında münasibətləri normallaşdırmaq istədiklərini deyib. İki xalqın min il ərzində bir yerdə yaşadığını vurğulayan Ə. Davutoğlunun fikrincə, türklər və ermənilərin keçmişi ilə Avropada yəhudilərin başına gələnləri eyniləşdirmək yanlışdır: “Əvvəla, ermənilərlə biz qapı qonşuyuq. Bəli, 1915-ci ildə biz ağrı-acılı günlər yaşadıq və bu acını bölüşməyə hazırıq. Lakin bizi soyqırımında ittiham edənlərə demək istəyirəm ki, eyni illərdə Qafqazda və Balkanlarda türklərin başına gələnlər nədir? Bu gün niyə Türkiyədə albanların, bosniyalıların, gürcülərin sayı öz ölkələrində olduğundan daha çoxdur? Çünki onlar da eyni şeyləri yaşadıqları üçün köç etmək məcburiyyətində qaldılar. Lakin biz bu gün bəzi Balkan xalqlarını soyqırımında ittiham etmirik, Türkiyəyə köçmüş çeçenlər və abxazlara görə rusları günahlandırmırıq. Ahıska türklərinin hamısı Stalin dövründə vətənlərindən sürgün olundu. Ancaq biz Rusiyanı Ahıska türklərinə qarşı soyqırımı törətməkdə ittiham etmirik. Çünki bunlar arxada qalıb. Bu günə qalan sadəcə xatirələrdir”.

Buna baxmayaraq, Ə. Davutoğlu 1915-ci il hadisələrinin müzakirəsinə, bu mövzuda diskussiya aparmağa hazır olduqlarını da əlavə edib: “Baş verənləri birtərəfli olaraq anlatmayın. İki tərəfin də başına gələnləri dinləyin. Ancaq qapıları bağlamayın, ittiham etməyin və qulaq asın”.

Ermənistanın gündən-günə yoxsullaşdığına diqqət çəkən türkiyəli nazir qonşuları olan bu ölkə ilə əməkdaşlıq etməyi arzuladıqlarını bildirib. Onun sözlərinə görə, yeni Qafqazın qurulması və normallaşma prosesi yalnız qarşılıqlı anlayış və hörmət əsasında baş tuta bilər. O, Azərbaycanla Ermənistan arasında normallaşmanın da zəruriliyini vurğulayıb: “Ermənistan-Azərbaycan münasibətləri də normallaşmalıdır. Bu iki xalq arasında normallaşma baş tutmazsa, bölgədə əməkdaşlıq bir ayaqlı olar”.

Ə. Davutoğlu Qarsdan yola çıxan avtomobilin İrəvan vasitəsilə Bakıya hərəkət etməsi barədə xəyalını bir daha dilə gətirib: “Ermənistan bölgədə sülhün təmin olunmasını istəyirsə, Azərbaycanla sülh əldə etməlidir və işğal etdiyi Azərbaycan torpaqlarından çıxmalıdır”.