Qardaş ölkələr ikitərəfli əlaqələrini gücləndirmək istəyirlər

SON XƏBƏRLƏR

Qardaş ölkələr ikitərəfli əlaqələrini gücləndirmək istəyirlər

2021.10.20, 07:36

Gunaz.tv

GünAzTv: Dünən Azərbaycan prezidenti İlham Əliyevin Özbəkistana rəsmi səfəri başlayıb. İki günlük səfər zamanı bir sıra ikitərəfli sazişlərin imzalanacağı və əmtəə dövriyyəsinin artırılması yollarının götür-qoy ediləcəyi xəbər verilir. Belə ki, həm Bakı, həm Daşkənd ikitərəfli əlaqələrin mövcud səviyyəsindən məmnun deyil.

Diplomatik mənbələrə əsasən, Azərbaycan-Özbəkistan danışıqları zamanı ölkələr arasında bir neçə sənədin imzalanması nəzərdə tutulur. Onlar arasında ən mühüm sənəd 5 ilə nəzərdə tutulan iqtisadi əməkdaşlıq haqqında sazişdir.

GünAzTv mətbuat mərkəzinin BBC-yə istinadən yaydığı məlumata görə, Tərəflərin ticarət-iqtisadi əlaqələrə önəm verməsi isə əmtəə dövriyyəsinin cüzi olması ilə izah olunur. Rəsmi statistikaya görə, bu göstərici indi cəmi 47 milyon dollar təşkil edir.

Azərbaycan Özbəkistandan təyyarə, avtobus və minik avtomobilləri, Özbəkistan isə Azərbaycandan tunel qazan maşınlar və polietilen almaq niyyətindədir.

İqtisadi sahədən savayı tərəflərin müştərək bəyannamə, mədəniyyət sahəsində mübadilə və XİN-lər arasında əməkdaşlıq haqqında sənədlərə imza atmaları gözlənilir.

Azərbaycan-Özbəkistan parlamentlərarası əlaqələr qrupunun rəhbəri Zahir Oruc deyir ki, iki dövlətin tarixi İpək yolundan tutmuş müasir transmilli layihələrdə “ortaq nöqtələrini” tapmaq mümkündür. İkitərəfli münasibətləri genişləndirmək üçün digər mühüm amil isə Daşkəndin Qarabağ münaqişəsinin çözümündə ardıcıl olaraq Bakını dəstəkləməsidir.

Belə ki, Özbəkistanın bu günə kimi Ermənistanla diplomatik əlaqələr qurmadığı deyilir. “Özbəkistan beynəlxalq səviyyədə və beynəlxalq qurumlardakı səsvermələr zamanı bizi daima müdafiə edib”.

Bildirildiyinə görə, özbək tərəfi öz mallarını qərbə çıxarmaq üçün Azərbaycan-Gürcüstan-Türkiyə nəqliyyat dəhlizindən bəhrələnməyi düşünür.

Bundan savayı Özbəkistanın Azərbaycanın enerji daşıyıcılarında maraqlı olması yayılan digər məlumatlar sırasındadır.

Lakin Azərbaycan və Özbəkistanı yalnız ticarət düşündürmür. Tarixi keçmiş nəzərə alınsa iki ölkə arasında mədəni əməkdaşlıq pespektivinin güclü bünövrəsi var.

Xalq şairi Sabir Rüstəmxanlı deyir ki, “Özbəkistan kultoroloji baxımından Azərbaycana təsəvvür edildiyindən də yaxındır”.

Sabir Rüstəmxanlı Özbəkistanın türk dilli məkanın ayrılmaz parçası olduğunu xatıraldır. Halbuki, özbək rəhbərliyinin türk dilli sammitlərə ardıcıl qatılmaması bu sahədə əməkdaşlığı bir qədər ləngidib. Xalq şairi hesab edir ki, siyasi və iqtisadi yaxınlaşma üçün “mədəni dəyərlərin ortaqlığı ən münbit zəmindir və bunun üçün siyasi iradə yetərlidir”.

GUNAZ.TV

SON XƏBƏRLƏR