GünAzTv: Azərbaycan prezidenti İlham Əliyev sentyabrın 24-də Nyu-Yorkda ABŞ (Amerika Birləşmiş Ştatları) prezidenti Barak Obama ilə görüşüb. Görüşdə ABŞ prezidentinin milli təhlükəsizlik üzrə müşaviri Ceyms Cons, ABŞ-ın BMT-dəki səfiri Süzan Rays, Ağ Evin məsləhətçisi Valeri Karrett iştirak edib.    Görüşdən sonra prezidentlər heç bir açıqlama verməyiblər. Görüş zamanı isə jurnalistlərə yalnız bir neçə dəqiqəlik foto çəkməyə imkan verilib ("Azadlıq" radiosu).    AzərTAc-ın xəbərinə görə, görüşdə Azərbaycan ilə ABŞ arasında strateci əməkdaşlıq prinsiplərinə əsaslanan ikitərəfli münasibətlərin müxtəlif sahələrdə uğurla inkişaf etməsindən məmnunluq ifadə olunub: "Prezident Barak Obama prezident İlham Əliyevin liderlik rolunu qeyd edərək, Azərbaycanın regionda ən çox uğurlar qazanan və ən nüfuzlu ölkələrdən biri olduğunu vurğulayıb. Ölkələrimiz arasında siyasi əlaqələrin yüksək səviyyədə olduğu bildirilərək, iqtisadi, enerji, təhlükəsizlik sahələrində əlaqələrimizin regional əməkdaşlığın möhkəmlənməsi baxımından əhəmiyyəti qeyd edilib. Azərbaycan ilə ABŞ-ın beynəlxalq antiterror əməliyyatlarında birgə fəaliyyətinə toxunulan görüşdə Azərbaycanın bu əməliyyatlarda iştirakı yüksək qiymətləndirilib.    Energetika sahəsində ölkələrimiz arasında uzun illər səmərəli əməkdaşlığın həyata keçirildiyi bildirilərək, Azərbaycanın beynəlxalq enerci əməkdaşlığının genişləndirilməsinə töhfəsi xüsusi qeyd olunub.    Dövlət başçıları Ermənistan-Azərbaycan, Dağlıq Qarabağ münaqişəsindən danışaraq, problemin tezliklə nizama salınmasının regionda sülhün və sabitliyin təmin edilməsi baxımından zəruri olduğunu bildiriblər.    Prezident İlham Əliyev münaqişənin həlli ilə əlaqədar danışıqlar prosesinə toxunaraq, Ermənistan-Azərbaycan, Dağlıq Qarabağ münaqişəsinin ölkəmizin ərazi bütövlüyü prinsipi əsasında həll olunmasının vacibliyi ilə bağlı mövqeyini bir daha diqqətə çatdırıb.    Dövlət başçılarının görüşündə Azərbaycanda demokratik inkişaf prosesləri ilə bağlı fikir mübadiləsi aparılıb.    Görüşdə, həmçinin regional və beynəlxalq məsələlər də müzakirə edilib".    Xatırladaq ki, görüşdən əvvəl ABŞ rəsmiləri bildirmişdilər ki, Obama ABŞ-ın Əfqanıstandakı əməliyyatlarında vacib tərəfdaş olan Azərbaycanın dövlət başçısı ilə bu istiqamətdə müzakirələr aparacaq.    Prezidentlərin görüşü ərəfəsində Vaşinqtondakı Qafqaz və Mərkəzi Asiya İnstitutunun Araşdırmalar Departamentinin rəhbəri Svante Kornel bildirib ki, Obama administrasiyası Azərbaycanla münasibətləri bərpa etməyə çalışır":Bunu ABŞ-ın Azərbaycana qarşı siyasətində prioritetlərin dəyişməsi hesab etmək olmaz. Sadəcə, hazırda Azərbaycan administrasiyanın gündəliyindədir. Hər zaman olduğu kimi, Amerika hökuməti maraqların irəliləməsi problemi ilə üzləşir. Bura strateji məsələlər, təhlükəsizlik, energetika və ticarət məsələləri, həmçinin demokratiya və insan hüquqları məsələləri daxildir. Çox güman ki, bunların hamısı müzakirə olunacaq. Lakin məsələnin mahiyyəti ondadır ki, Administrasiya Əfqanıstana tranziti təmin etmək üçün Azərbaycanla əməkdaşlıq etməlidir. Beləliklə, Administrasiyanın regional siyasəti əvvəlkitək Cənubi Qafqaza və onun maraqlarına yox, kənara, məhz Əfqanıstana yönəlib. Bu, təəssüf doğurur..."    Digər amerikalı analitik, Xarici Siyasi Araşdırmalar İnstitutunun baş əməkdaşı Cerald Robbins isə istisna etmir ki, Azərbaycan və ABŞ prezidentlərinin görüşü İrana həsr olunub.    1990-cı illərin ortalarında Bakıda "Freedom House" proqramının direktoru işləmiş Robbins "Turan"ın Vaşinqton müxbiri ilə söhbətində bildirib ki, Ağ Ev Türkiyənin İrana qarşı sanksiyanı dəstəkləməkdən imtina etməsindən narazı qalıb. Odur ki, başqa yerdə dəstək axtarır":Bu zaman Azərbaycanın İranla yaxınlığı və bu ölkədə nəhəng Azərbaycan diasporunun olması nəzərə alınır. Bunlar əhəmiyyətli rol oynayan mühüm amillərdir".    Analitik əmindir ki, Amerika-Azərbaycan münasibətlərinin gələcəyi bu görüşün yekunlarından çox asılı olacaq.