GünAzTv: Soydaşlarımız Biləsuvardan keçərək İran ərazisinə (Güney Azərbaycan ərazisi), oradan da Culfadan keçməklə Naxçıvana gəlir və geri qayıdırlar.

Bu günlərdə Bakıdan İran vasitəsilə avtobus və şəxsi maşınları ilə Naxçıvana gedən bir qrup Azərbaycan vətəndaşı "Bakı-xəbər" qəzetinin redaksiyasına müraciət ediblər. Adını çəkdiyimiz qəzet yazır ki, Cənub qonşularımız yaşayan tərəfdə onlara yaradılan süni maneələrdən bəhs edən şikayətçilər bu hallara son qoyulmasını tələb edir.    Qeyd edək ki, bu insanlar Biləsuvardan keçərək İran ərazisinə, oradan da Culfadan keçməklə Naxçıvana gəlir və geri qayıdırlar. İran ərazisindən keçən məsafə cəmi-cümlətani 3-4 saatlıq bir yoldur. Amma yolu qət edən soydaşlarımızın söylədiyinə görə, mənzil başına çatmaq onlara 14-15 saata başa gəlir. Yəni bu yoldan istifadə edən vətəndaşlarımız sözügedən məsafəni uzağı 4 saata qət etməli olduğu halda, bundan 3-4 dəfə artıq vaxt sərf etməli olur. Maraqlıdır, niyə? Səbəbi nədir ki, analoji məsafəni qət etməyə bu qədər artıq vaxt gedir? Azərbaycan tərəfindən həmin yolu qət edənlərə münasibətdə hər hansı bir problem yoxdur. İnsanlar bu tayda mövcud prosedurlardan vaxtında və uğurla keçir. Onlar üçün problem İran ərazisində, daha doğrusu, sərhədin o tayında yaşanır. Burada soydaşlarımızın başına görünməmiş zülm açırlar. İran sərhədçiləri bu zaman yolu qət edənlər arasında xəstənin, uşağın, qocanın olmasına belə əhəmiyyət vermir. Sərhədçilər şəxsiyyəti təsdiq edən sənədləri toplayaraq, möhür vurmaq adı ilə aparırlar. Bu minvalla sənədlərin yoxlanışı az qala 3-4 saata qədər uzanır. Halbuki, müasir texnika şəraitində kompüter vasitəsilə belə yoxlamaları beşcə dəqiqəyə həll edib başa çatdırmaq olar. İnsanlar isə saatlarla gözləməkdən əziyyət çəkir. Qızmar istilərin olduğu şəraitdə isə bu vəziyyət özünü daha qabarıq şəkildə göstərir. Bu özbaşınalığa etiraz edənləri isə geri qaytaracaqları ilə hədələyir, sənədlərinin düz olmadığını uydururlar. Hətta bəzən kompüterlərin işləmədiyini bəhanə edərək, sənədlərin yoxlanışını dayandırırlar. Bu işdə, xüsusən də, qarşı tərəfin sərhədçiləri canfəşanlıq nümayiş etdirir. Sözsüz ki, belə ləngimələr qəsdən edilir və süni surətdə yaradılıb. Burada da bir məqsəd ola bilər. Bildiyimiz kimi, bir müddət bundan öncə İran tərəfi birtərəfli qaydada Azərbaycanla viza rejimini ləğv etdi. Bakı isə, bəzi məqamları nəzərə alaraq, hələlik həmin prosedura getməyib. Yəni öz növbəsində o da analoji addımı atmayıb. Görünür, bu məqam Tehranı qane etmədiyindən onlar sərhədi keçən soydaşlarımıza belə süni maneələr yaratmaqla Azərbaycana analoji addımı atması üçün təzyiq etməyi düşünürlər. Bunun üçün də camaata münasibətdə belə özbaşınalığa yol verirlər ki, onlar vasitəsilə hökumətimizdən viza rejiminin ləğvinə nail olsunlar. İran tərəfinin sözügedən vəhşiliyinə etiraz edənlər bu ölkənin Bakıdakı səfirliyi qarşısında etiraz aksiyası keçirməyi düşünür. Hələlik isə onlar qəzetimiz vasitəsilə İran səfirliyi və hökumətini belə qərəzli hərəkətlərə son qoymağa çağırır.