GünAzTv: Körpəz ölkələri Tehrandan ehtiyyatlanaraq silah alqı-satqısına 123 milyard dollar pul ayırıb.

Körfəz bölgəsində ərəb ölkələri arasında yeni bir silahlanma kampaniyası yaşanır. İngiltərənin «Financial Times» qəzeti dünən yaydığı bu xəbərdə hazırkı silah alışları tarixdə sülh zamanlarında müşahidə olunan ən böyük silah tədarükü kampaniyası olaraq xarakterizə edib. Qəzetə görə, ərəb ölkələri, xüsusilə İrandan gözlənildiyi iddia edilən təhdidə qarşı mövqelərini gücləndirmək məqsədilə ümumilikdə 123 milyard dollar vəsaiti silah alışlarına yönəldiblər.

Silahlanma yarışında ilk sırada 67 milyard dollarla Səudiyyə Ərəbistanı gəlir. Riyad rəhbərliyi ABŞ-la öz tarixində ən böyük silah alqı-satqı sazişini imzalayıb. İranın nüvə səyləri ilə bağlı qayğıların fonunda İsrailin bu ölkəyə qarşı mümkün birtərəfli hücumundan sonra Tahranın cavab zərbələrindən narahatlıq keçirən Körfəz ölkələrindən Birləşmiş Ərəb Əmrlikləri 35, Əmman 12, Küveyt isə 7 milyard dollarlıq silah razılaşması imzalayıb. Dörd il ərzində həyata keçirilməsi nəzərdə tutulan sifarişlərin Amerikanın silah sektoruna nəhəng sərmayə təmin edəcəyi vurğulanan xəbərdə hərbi müdafiə eksperti Entoni Kordsmanın fikirlərinə də yer verilib: «Amerika Birləşmiş Ştatları İraq müharibəsindən sonra enerji qaynaqlarının qlobal iqtisadiyyata axınını zəmanət altına ala biləcək müdafiə sistemini hədəfə almaqdadır». Silah satışının bölgədə daşındırıcı effekt yaradacağı və ABŞ-ın bölgəyə göndərməyə zərurət duyduğu qüvvələrin miqdarını azaltmağa imkan verəcəyi gözlənilir. Bölgə ölkələrinin əksəriyyəti hava hücumundan müdafiə sistemləri üçün ABŞ istehsalı olan «Patriot» raket batareyalarına bel bağlayır. Qəzet İranın sürətlə inkişaf etdirdiyi ballistik raketləri qeyri-adi döyüş başlıqları, bəlkə də nüvə başlığı ilə istifadə etməsi ehtimalının Körfəzdəki liderlərin dincliyini pozduğunu yazır. Birləşmiş Ərəb Əmrlikləri bu səbəbdən ABŞ-ın müdafiə sistemləri ilə yanaşı, Fransanın «Dassault» şirkətindən də 80 «Rafale» döyüş təyyarəsi almağı nəzərdə tutur. Dörd ildə 22,88 milyard dollara çatması gözlənilən alqı-satqı əməliyyatlarında ən böyük payın «Boeing» şirkətinə düşəcəyi təxmin edilir. «Lockheed Martin» və «Raytheon» da ön sıralarda gələn şirkətlərdəndir. Qəzetə görə, bu silahlanma yarışından kənarda qalmış kimi görünən yeganə bölgə ölkəsi Qətərdir. Əl-Udeyd bazasında Amerika Mərkəzi Komandanlığının qərargahlarından birinə ev sahibliyi edən Qətərin Amerikanın burada hərbi mövcudluğuna bel bağladığı, xərcləri isə hərbi nəqliyyat təyyarələrinə yönəltdiyi qeyd edilir. Bizim yol