Tehranda Azərbaycanın Müstəqilliyinin Bərpası günü qeyd olundu

SON XƏBƏRLƏR

Tehranda Azərbaycanın Müstəqilliyinin Bərpası günü qeyd olundu - FOTOLAR

2021.10.20, 07:36

Gunaz.tv

Azərbaycanın İrandakı Səfirliyi tərəfindən təşkil edilmiş rəsmi qəbulda İran XİN-nin rəsmi şəxsləri, İqtisadi Əməkdaşlıq Təşkilatının Baş katibi və müavinləri, Tehranda yerləşən diplomatik missiyaların rəhbərləri və diplomatları, ictimaiyyətin nümayəndələri və İranda yaşayan azərbaycanlılar iştirak ediblər.

Hər iki ölkənin dövlət himnlərinin səsləndirilməsi ilə başlanan mərasimdə çıxış edən Azərbaycanın İrandakı səfiri Əli Əlizadə Azərbaycan xalqının ümummilli lideri Heydər Əliyevin Azərbaycanın müstəqilliyinin bərpası və qorunub saxlanılmasındakı xidmətlərini vurğulayıb, Azərbaycanda aparılan sosial-iqtisadi islahatlar, əldə olunan nailiyyətlər haqqında məlumat verib.

Əli Əlizadə ölkənin sürətli inkişafı və dinamik tərəqqisi ilə yanaşı, Azərbaycan Prezidenti İlham Əlyevin apardığı siyasət nəticəsində Azərbayca xalqının bu 30 il ərzində mübarizə apardığı əsas məqsədinə - işğal olunmuş torpaqların azad edilməsi və müasir, müstəqil Azərbaycanın ərazi bütövlüyünün bərpasına nail olduğunu bildirib.

Səfir, Azərbaycanın dinamik inkişafı, xalqımızın yüksək milli ruhu və birliyi, Azərbaycan Ordusunun peşəkarlığı və mübarizliyi, eləcə də qəhrəman şəhidlərimizin fədakarlığı sayəsində Ali Baş Komandanın rəhbərliyi ilə Azərbaycanın işğalçı Ermənistanı Vətən Müharibəsində məğlub etdiyini və 30 ilə yaxın qanunsuz işğal altında saxlanılan Azərbaycan ərazilərini azad edərək Azərbaycanın öz ərazi bütövlüyünü təmin etdiyini, erməni işğalına son qoyaraq bölgədə sülh və ədaləti bərpa etdiyini vurğulayıb.

Azərbaycanın dünya dövlətləri ilə səmərəli ikitərəfli əlaqələrindən bəhs edən səfir Əli Əlizadə qonşu ölkə olan İranla da ikitərəfli münasibətlərin inkişafının Azərbaycanın xarici siyasətinin əsas prioritet istiqamətlərindən birini təşkil etdiyini və müstəqilliyin ilk günlərindən İranla bütün sahələrdə yaxın və dostluq əlaqələrinin qurulduğunu bildirib.

Əlaqələrimizin hər zaman üzərindən qətiyyətlə aşa bildiyimiz bəzi eniş və yoxuşlar da gördüyünü bildirən səfir, bütün bu keçilən sınaqların münasibətlərimizin dostluq və əməkdaşlığa söykəndiyini bir daha sübut etdiyini qeyd edib.

Səfir xalqlarımız və ölkələrimiz arasında dostluğa, tərəfdaşlığa, yaxın qonşuluğa və qarşılıqlı hörmətə əsaslanan əməkdaşlığın davam etdiriləcəyinə inandığını bildirib və bütün bunların Azərbaycan-İran dostluğunun daha da möhkəmlənməsində mühüm rol oynayacağını vurğulayıb.

Rəsmi hissənin başa çatmasından sonra Azərbaycanlı uşaqların ifasında “Naz eləmə” rəqsi təqdim olunub, “Arşın mal alan” operettasından kiçik səhnəcik nümayiş edilib və “Azərbaycan” şeiri səsləndirilib. Tədbir Azərbaycan xalq və milli musiqisinin sədaları altında verilən ziyafət ilə davam edib. (modern.az)

Ayxan

GUNAZ.TV

SON XƏBƏRLƏR