Azərbaycan səfirliyinə hücum edən Yasin Hüseynzadə kimdir?

SON XƏBƏRLƏR

Azərbaycan səfirliyinə hücum edən Yasin Hüseynzadə kimdir?

2025.05.22, 09:49

Mayın 21-də İran mediası 27 yanvar 2023-cü ildə Azərbaycan Respublikasının Tehrandakı səfirliyinə silahlı hücum edən, 1 əməkdaşı öldürüb, iki əməkdaşı yaralayan Yasin Hüseynzadənin edam edildiyini yazıb.

Gunaz.tv

Yasin Hüseynzadə 1971-ci ildə Şərqi Azərbaycan əyalətinin Mərənd şəhərinin Yekan Olya kəndində anadan olub.

Yasin (Səfər) Hüseynzadə 1987-ci ildə İran İnqilab Keşikçiləri Korpusunun sıralarına qatılıb və İran-İraq müharibəsi zamanı qısa müddət ərzində 31-ci Aşura diviziyasında döyüşdə iştirak edib.

Müharibə başa çatdıqdan sonra Təbrizdə İnqilab Keşikçiləri Korpusunda ağır maşın sürücüsü kimi işləməyə davam edib. O, 1999-cu ildə könüllü olaraq SEPAH-dan təqaüdə çıxıb, meyvə və bal satışı ilə məşğul olub.

Həmin illərdən o Tehrana köçüb və ilin bir neçə ayını Tehranda, qalan vaxtları isə Mərənd mahalında atasının kəndi Yekan Olyada, eləcə də Ördəkli bölgəsində yaşayıb.

Yasin Hüseynzadə, 1999-2006-ci illərdə Mərənddəki Yaldur məscidinin SEPAH-a bağlı "Bəsic" (yarım hərbi könüllülər ordusu) qüvvələrinin başçısı olub, Azərbaycan Respublikasının səfirliyinə hücum edən vaxta qədər də adı çəkilən "Bəsic" qərargahı ilə əlaqəsini qoruyub saxlayıb.

Y. Hüseynzadənin 2022-ci ildə İranda başlayan etiraz aksiyalarında "Bəsic" və İnqilab Keşikçiləri Korpusu (SEPAH) ilə birlikdə Təbriz, Marağa və Bukan şəhərlərində etiraz nümayişlərinin yatırılmasında iştirak etdiyi barədə məlumatlar yayılıb.

27 yanvar 2023-cü il səhər saatlarında Yasin Hüseynzadə qatlanan Kalaşnikov AK-47 silahı ilə səfirliyə hücum edib. Hücumdan sonra o İran polisinə təhvil verilmədən öncə Azərbaycan səfirliyinin mühafizəçilərinin əlində olan silahın fotosu yayılıb.

Azərbaycan səfirliyinin mühafizə xidmətinin əməkdaşının dediyinə görə, silahın seriya nömrəsi saxtalaşdırılıb və onun qundağının seriya nömrəsi N---12067-dir ki, bu da hazırda daxili mənbələr vasitəsilə araşdırılır.

Bu silah İran İslam Respublikasının silahlı qüvvələrinə aid deyil, lakin bu seriya aşkar edildikdən sonra 15 iyun 2008-ci ildə Lorestan Polis Dairəsinin İctimai Təhlükəsizlik Komandanlığı tərəfindən qəbul edilib. Və ən azı 2021-ci ilin martına qədər Zəncan əyalətində polis qüvvələrinin aşkar etdiyi silah və sursatlar anbarında saxlanılıb.

Silah Yasin Hüseynzadəyə necə çatıb?

Bu suala İranın əlaqədar dövlət qurumları cavab verməli olsalar da, bu günə kimi bununla bağlı açıqlama verilməyib.

Bu isə Azərbaycan Respublikasının səfirliyinə hücumun hökumətə bağlı hansısa qurum tərəfindən planlaşdırıldığı ehtimalını artırır.

Azərbaycan Respublikasının Prezidenti İlham Əliyev də, bundan əvvəl məsələ ilə bağlı verdiyi müsahibələrdə hücumçu və hücumun arxasında duran şəxslərin cəzalandırılmasını tələb edib.

İran mediasının məlumatına görə, hücumçu bu gün cəzalandırılıb, hücumun arxasında duran, onu planlaşdıran şəxslərin elan edilməsi və cəzalandırısı məsələsi isə qeyri-müəyyən olaraq qalır.

Cavidan

GUNAZ.TV

SON XƏBƏRLƏR