GÜNEY AZƏRBAYCAN MİLLİ AZADLIQ CƏBHƏSİNİN AÇIQLAMASI

SON XƏBƏRLƏR

GÜNEY AZƏRBAYCAN MİLLİ AZADLIQ CƏBHƏSİNİN AÇIQLAMASI

2025.07.23, 09:10

Milli İradəyə Sadiqlik – Müstəqil Siyasi Yön – Azərbaycan Mərkəzli Milli Hərəkət

Gunaz.tv

Güney Azərbaycan Milli Azadlıq Cəbhəsi (GAMAC) olaraq bildiririk ki, milli azadlıq hərəkatımızın əsas dayağı millətimizin öz iradəsinə əsaslanan müstəqil və Azərbaycan mərkəzli siyasi mövqedir. Hərəkatımızın fəaliyyəti heç bir xarici gücdən və ya regional mərkəzdən asılı olmadan, yalnız Güney Azərbaycanda yaşayan Azərbaycan türklərinin milli-siyasi maraqları və tarixi məsuliyyəti çərçivəsində müəyyən olunur.

2025-ci il iyunun 27-də Güney Azərbaycana mənsub bəzi qurum və təşkilatlar tərəfindən təsis edilmiş “Güney Azərbaycan Təşkilatlarının Əməkdaşlıq Şurası” (GATƏŞ) ilə bağlı millətimizə açıq şəkildə bildiririk ki, GAMAC bu prosesin ilkin mərhələsində milli həmrəylik və koordinasiyalı birgə fəaliyyət zərurətini nəzərə alaraq iştirak etmiş, xoş niyyətlə milli hərəkatın gücləndirilməsinə töhfə vermək və birgə fəaliyyəti dəstəkləmək məqsədilə bu təşəbbüsə qatılmışdır.

Lakin, təqdim olunan konseptual çərçivə daxilində prinsiplər hərtərəfli təhlil edildikdən sonra, bir sıra ciddi narahatlıq doğuran məqamların mövcudluğu səbəbi ilə, GAMAC sözügedən bu platformadan ayrılmağa qərar verdi.

Özəlliklə vurğulamaq istərdik ki:

Həmin platformada milli hərəkatın əsas fəlsəfəsi olan müstəqil siyasi qərarvermə hüququ və Azərbaycan mərkəzli yol xəritəsi aydın şəkildə ifadə olunmamışdır;
Təqdim edilən sənədlərdə və ümumi yanaşmalarda Tehran mərkəzli düşüncə nümunələrinin mövcudluğu, həmçinin bunların strateji xətt kimi təqdim olunması açıq şəkildə bəyan edilmişdir;
Milli iradəyə əsaslanan müstəqil qərarvermə prinsipinin digər siyasi proseslərin təsiri altında dəyərləndirilməsinə meyillər müşahidə olunmuşdur;

Bütün bunlar milli hərəkatın ideoloji, milli-siyasi prinsipi və özünəinam mövqeyi ilə ziddiyyət təşkil edən ritorika və yanaşmaların formalaşmasına səbəb olmuşdur.

GAMAC bu yanaşmaları Güney Azərbaycan milli hərəkatının təməl dəyərlərinə və strateji hədəflərinə uyğun görmədiyi üçün GATƏŞ platformasından rəsmi şəkildə ayrıldığını bəyan edir.

Biz GAMAC olaraq millətimizə, milli-demokratik qurumlara və Güney Azərbaycanın taleyinə biganə qalmayan hər kəsə bildiririk ki, Güney Azərbaycan Milli Azadlıq hərəkatının apardığı bütün proseslərdə milli iradəyə hörmət, Azərbaycan mərkəzli müstəqil yol və kənar təsirlərə qarşı prinsipial mövqeyi dəyişməz olaraq qalacaq.

GAMAC bu yolda yalnız və yalnız öz millətinə arxalanır və bəyan edir ki, istənilən əməkdaşlıq yalnız bu prinsiplərə hörmət çərçivəsində mümkündür.

Bir daha vurğulayırıq ki, Güney Azərbaycan öz gələcəyini özü müəyyən edəcəkdir və bu millətin taleyinin siyasi yol xəritəsi nə Tehranda, nə də başqa bir xarici mərkəzdə yox, yalnız Güney azərbaycanlıların milli-siyasi iradəsi ilə yazılacaqdır.

Güney Azərbaycan Milli Azadlıq Cəbhəsi (GAMAC)
21.07.2025

GUNAZ.TV

SON XƏBƏRLƏR