İran Prezidenti Məsud Pezeşkian Amerikaya yola düşməzdən əvvəl Tehrandakı məktəblərdən birində olub, yeni tədris ilinin ilk zəngini çalıb.

Şagirdlər qarşısında fars dilində çıxış edən İran Prezidenti, onları ölkənin problemlərini həll etmək və yaxşı yaşamaq üçün elm öyrənməyə çağırıb.

Bununla yanaşı Təbrizin "Baqir əl-Ulum" məktəbində də oxşar mərasim keçirilib.

Mərasimə İranın yol və şəhərsalma naziri Fərzanə Sadiq, Şərqi Azərbaycan əyalətinin valisi Bəhram Sərməst, Əli Xaməneinin Şərqi Azərbaycandakı nümayəndəsi və Təbrizin cümə imamı Əhməd Mütəhhəri Əsl və başqa rəsmilər qatılıblar.

Açılışının və qonaqların çıxışının fars dilində edildiyi mərasimdə, hökumətin siyasi-ideoloji təbliğatı aparılıb, 12 günlük İran-İsrail qarşıdurması ilə bağlı hazırlanan kitab təqdim edilib.

Mərasimlərdə ən çox diqqət çəkən məsələlərdən biri də, İran Prezidenti Məsud Pezeşkianın seçki qabağı təbliğat kampaniyasından fərqli olaraq, bütün çıxışlarının farsca etməsi ilə yanaşı,Təbrizdəki mərasimin də fars dilində keçirilməsi olub.

Yerli sosial mediadakı paylaşımlardan bəlli olur ki, bu, hətta Pezeşkiana dəstək və səs verən azərbayccanlıların da narazılığına səbəb olub.

Ona görə ki, Məsud Pezeşkian seçki qabağı təbliğat və təşviqat kampaniyasında qeyri-fars dillərinin tədrisi barədə də seçicilərə, xüsusən azərbaycanlılara söz vermişdi.

Qeyd edək ki, İran konstitusiyasında qeyri-fars dilləri ilə bağlı 15-ci maddənin olmasına baxmayaraq,  ölkədə on milyonlarla qeyri-fars xalqlar, o cümlədən azərbaycanlılar öz ana dillərində təhsil ala bilmir. 

Məsud Pezeşkianın seçkilərdə qalıb gəlməsi isə əsasən onun Urmu gölünün bərpası və qeyri-fars dillərinin tədrisi ilə bağlə seçicilərə, xüsusən azərbaycanlılara, türklərə verdiyi vədlər sayəsində olub.

O, bu vədlərlə əvvəlki seçkilərə qatılmayan çox sayda azərbaycanlını sandıq başına çəkə, onların dəstəyini qazana bilib.

Prezidentin hər iki vədi isə bu günə kimi özünü doğrultmayıb. Ona görə ki, Urmu gölünün bərpası bir yana, onun vədlərindən keçən dövrdə gölün bərpası prosesi dayandırılıb, sentyabrın əvvəlinə kimi isə göl tamamilə quruyub.

Onun qeyri-fars dillərinin tədrisi və ya öyrənilməsi ilə bağlı vədi də ekoloji problemin həllinə dair verdiyi vəddən fərqlənməyib.

Bundan əvvəl bəzi tədbirlərdə Azərbaycan dilində bir-iki beyt şeir oxumaqla məşhurlaşan və azərbaycanlıların bir hissəsinin rəğbətini qazanan Pezeşkanın, yeni tədris ilinin başlaması ilə bağlı keçirilən mərasimlərdə bunu da etməməsi azərbaycanlı seçicilərinin məyusluğuna səbəb olub.

Məsud Pezeşkian hansısa səbəblərdən ya vədlərini unudub və ya hakim sistemin cızdığı xəttdən qırağa çıxmamaq barədə xəbərdarlıq alıb.

Hər iki halda o bu vədləri ilə azərbaycanlıların və qeyri-fars xalqların əhəmiyyətli hissəsini seçkilərə cəlb etməklə nisbi də olsa rejimə legitimlik qazandıra, onun ömrünü ozada bilib.

Bu təcrübə isə bir daha sübut edir ki, İranda dəyişiklik prezidentlərin dəyişməsi ilə deyil, sistemin dəyişməsi ilə mümkün olacaq!

GünazTV