Beynəlxalq Əfv Təşkilatı İranla bağlı bəyanat yaydı

SON XƏBƏRLƏR

Beynəlxalq Əfv Təşkilatı İranla bağlı bəyanat yaydı

2025.10.17, 13:53

İranda edamların artması qorxulu həddə çatıb və beynəlxalq ictimaiyyət bunun dayandırılması üçün dərhal hərəkətə keçməlidir.

Gunaz.tv

Bu, Beynəlxalq Əfv Təşkilatının yaydığı bəyanatda deyilib.

Bəyanatda etnik və dini azlıqların və Əfqanıstan vətəndaşlarının digər qruplara nisbətən daha çox edam riski altında olduğu və bu ilki edamların əhəmiyyətli bir hissəsinin bu icmalara qarşı həyata keçirildiyi vurğulanıb.

Beynəlxalq Əfv Təşkilatının məlumatına görə, 2025-ci ilin əvvəlindən İranda 1000-dən çox məhbus edam edilib ki, bu da gündə orta hesabla dörd edam deməkdir və bu edam sayı son 35 ilin ən yüksək göstəricisidir.

“İslam Respublikasının hakimiyyət orqanları ölüm hökmündən müxalifəti qorxutmaq və susdurmaq üçün bir vasitə kimi istifadə edirlər”,- təşkilatın Yaxın Şərq və Şimali Afrika üzrə regional direktorunun müavini Hüseyn Baoumi deyib.

İnsan haqları təşkilatı ölüm hökmlərinin əksəriyyətinin narkotik cinayətləri ilə bağlı olduğunu qeyd edərək, bir çox hallarda məhkəmə prosesində minimum ədalətli mühkimə standartlarının olmadığını və hökmlərin məcburi etiraflar əsasında verildiyini bildirib.

Beynəlxalq Əfv Təşkilatı BMT-yə üzv dövlətləri Baş Assambleyanın qarşıdan gələn sessiyasında İran hökumətini edamları dərhal dayandırmağa, çıxarılan hökmləri ləğv etməyə və narkotiklərlə bağlı qanunlarda islahatlar aparmağa dəvət etməyə çağırıb.

Beynəlxalq Əfv Təşkilatına görə, Bəluc vətəndaşları İranda ən yüksək edam nisbətinə sahib olmaqda davam edir, halbuki bu icma ölkə əhalisinin yalnız 5-6 faizini təşkil edir.

"Edam edilən bəlucların əksəriyyəti aztəminatlı qruplardandır, onlar narkotiklə bağlı ittihamlara görə məhkum ediliblər və məhkəmə prosesində ədalətli mühakimə olunmayıblar",- bəyanatda diqqətə çatdırılıb.

Qeyd edək ki, 2025-ci ilin əvvəlindən bu günə kimi İranda 1152 məhbus edam edilib. Onlardan 32-i qadındır.

GünazTV

GUNAZ.TV

SON XƏBƏRLƏR