Siyasi qaçqınlar da ölkəyə qayıda bilər

SON XƏBƏRLƏR

Siyasi qaçqınlar da ölkəyə qayıda bilər - Calalian

2025.10.30, 14:23

Siyasi səbəblər üzündən ölkəni tərk edən vətəndaşlar da İrana geri qayıda bilər və kimsə bunun qarşısını almamalıdır.

Gunaz.tv

Bunu İran ədliyyə nazirinin İnsan Hüquqları və Beynəlxalq İşlər üzrə müavini Əsgər Calalian deyib.

"Ancaq, əgər həmin şəxs cinayət törədibsə, ölkənin daxili qanunlarına əsasən o cəzasız qalmamalıdır",- nazir müavini bildirib.

O, həmin məsələlərin dəqiqləşdirilməsi ilə bağlı platforma yaradıldığını və orada suallara cavab verildiyini bildirib.

İnsan haqları təşkilatları və hüquqşünaslar Calaliyanın açıqlamasında qaranlıq məqamların olduğunu, siyasi düşüncəsinə görə ölkədən mühacirətə məcbur olan şəxslərin İrana qayıtdıqları təqdirdə həyatlarının təhlükədə olduğunu bildiriblər.

Onların fikrincə, xarici ölkə vətəndaşlarını saxta ittihamlarla həbs edən İran hökumətinin, müxalifətdə olan öz vətəndaşlarına qarşı güzəştli davranacağı aldadıcıdır.

Qeyd edək ki, İran hökuməti “Xaricdəki iranlılara dəstək” adlı qanun layihəsini qəbul edib və bir müddət əvvəl Xarici İşlər Nazirliyində "Xaricdə yaşayan iranlılara dəstək bölməsi" qurulub.

Adı çəkilən qanun layihəsi İran parlamentində müzakirəyə çıxarılıb və qəbul olunub.

Qanun layihəsinə görə, hökumət altı ay ərzində xaricdə yaşayan bütün iranlıların hərtərəfli məlumat bazasını hazırlamalı və hər il parlamentin Milli Təhlükəsizlik Komissiyasına onların statusu haqqında hesabat təqdim etməlidir.

GünazTV

GUNAZ.TV

SON XƏBƏRLƏR