İranda internetin kəsilməsi və ciddi şəkildə məhdudlaşdırılması səbəbindən, istifadəçilər yalnız riskli və məhdud VPN bağlantıları vasitəsilə tədricən qlobal şəbəkəyə çıxa biliblər. Nəticədə, 2026-cı ilin 8–10 yanvar tarixlərində baş verən hadisələrlə bağlı olduqca sarsıdıcı hesabatlar, görüntülər və videolar bir neçə gün gecikmə ilə ölkə xaricinə ötürülməkdədir. Bu məlumatlar beynəlxalq ictimaiyyəti şok və dərin narahatlıq içində qoyub.

Yerli mənbələrdən daxil olan məlumatlara görə, İran hökumətinə bağlı repressiv qüvvələr bir neçə şəhərdə döyüş sursatından istifadə, ağır fiziki zorakılıq və təşkilatlanmış şiddət yolu ilə xalq etirazlarını qanlı şəkildə yatırıb.

Tehranın Naziabad bölgəsində 18 yaşlı Milad Həsənzadə ayaq və qarın nahiyəsindən iki döyüş gülləsi ilə yaralanıb, dörd cərrahi əməliyyata baxmayaraq, həyatını itirib.

Eyni zamanda, Fars vilayətinin Qaimiyyə şəhərində 15 yaşlı Qaşqay Türkü Cəbar PənahiAzad baş nahiyəsindən açılan atəş nəticəsində öldürülüb.

Bundan əlavə, Tehranın Yusufabad məhəlləsində yaşayan Rahilə Müini, Səadətabad aksiyaları zamanı ayağından yaralanıb. O və bir dostu xəstəxanaya aparılmaq üçün bir küçədə gizləndikdən sonra yoxa çıxıblar və bu günədək onların taleyi barədə heç bir məlumat yoxdur.

Yayımlanan videolar İran hökumətinə bağlı qüvvələrin insanlara, xüsusilə qadınlara qarşı açıq və amansız zorakılıq tətbiq etdiyini göstərir. Görüntülərin birində bir qadının küçədə təpiklə, soyuq silahla döyüldüyü və saçlarından sürüyərək yerə yıxıldığı açıq şəkildə görünür.

Zəncan şəhərindən daxil olan şahid ifadələrinə görə, 8 Yanvar günü döyüş güllələri ilə genişmiqyaslı atəş açılıb və “qan gölü” yaradılıb. Şahidlər bildirir ki, ən azı 20 nəfər gözləri önündə güllələnib, bəzi cəsədlər və yaralılar şəxsi avtomobillərlə küçələrdən uzaqlaşdırılıb.

Oxşar məlumatlar İsfahan vilayətinin Hümayunşəhr şəhərindən də daxil olub və çoxsaylı itkilərdən xəbər verir.

Tehranda bir videoda Kaşani küçəsi və Sadiqiə meydanı ətrafında, Qoldis qülləsi istiqamətindən yüz minlərlə insanın üzərinə atəş açıldığı görünür.

Əlborz vilayətinin Bağistan bölgəsindən olan Babək Pourməzaheri isə repressiv qüvvələrin ürək nahiyəsinə açdığı birbaşa atəş nəticəsində həyatını itirib.

Səid Tərvəndin anım mərasimində iştirak edənlər Əli Xameneiyə qarşı şüarlar səsləndirərək İran hökumətinin zorla qəbul etdirmək istədiyi rəsmi narrativi rədd ediblər. Məlumatlara görə, bu qurbanın cənazəsi yalnız ailəsinə məcburi şəkildə hökumət yönlü açıqlama qəbul etdirildikdən sonra təhvil verilib.

İnsan hüquqları fəalları bildirirlər ki, internet məhdudiyyətlərinin davam etməsi səbəbindən öldürülənlərin, saxlanılanların və zorla yoxa çıxarılanların real sayı hələ də tam şəkildə məlum deyil. Hazırda yayımlanan məlumatlar baş verən repressiyaların yalnız bir hissəsini əks etdirir.

GünazTV

این ویدیو به روشنی نشانگر ذات وحشی و داعشی مزدوران خامنه‌ای‌ست. زنی را در خیابان به این شکل می‌زنند. اول فردی با قمه به سمتش می‌آید با لگد به سر و صورتش می‌زند و از موهایش او را روی زمین می‌کشد. pic.twitter.com/peWptdTA2r

— Richard Shahidnia (@DRShahiA20) January 24, 2026