Contact Us

SON XƏBƏRLƏR

19 Bəhmən Xamənəysiz: İran rəhbəri niyə gizləndiyi yeri tərk etmədi?

2026.02.09, 12:30
19 Bəhmən Xamənəysiz: İran rəhbəri niyə gizləndiyi yeri tərk etmədi?

19 Bəhmən Xameneyisiz keçdi؛ bu susqun yoxluq rejimin qorxu, qeyri-müəyyənlik və zəiflik içində olduğunu simvolik şəkildə ortaya qoydu.

Gunaz.tv

İran İslam Respublikasının ali rəhbəri Əli Xameneyi bu il (1404) ilk dəfə olaraq 37 illik hakimiyyəti dövründə 19 Bəhmən günü (8 fevral) Hərbi Hava Qüvvələrinin komandan və şəxsi heyəti ilə ənənəvi görüşdə iştirak etmədi. Bu görüş 1357-ci ildə homafərlərin Ruhullah Xomeyniyə beyəti münasibətilə keçirilir və indiyədək rejimin ən simvolik hərbi–ideoloji mərasimlərindən biri sayılırdı.

Xameneyinin yoxluğu təkcə protokol boşluğu deyil, açıq siyasi mesaj kimi dəyərləndirilir. Çünki bu mərasim illər boyu onun ABŞ-a meydan oxuduğu, daxili etirazları hədələdiyi və “rejimin gücünü” nümayiş etdirdiyi tribuna olub. Hətta COVID-19 pandemiyasının ən ağır günlərində belə bu ənənə pozulmamışdı.

Bu il isə səhnəyə Xameneyi deyil, Baş Qərargah rəisi Əbdülrəhim Musəvi çıxdı. Mərasim Xomeyni məzarlığında, daha sönük formatda keçirildi və Xamənəyinin özü barədə nə bir foto, nə də qısa açıqlama yayımlandı. Rəsmi susqunluq sualları daha da artırdı.

Analitiklər və sosial şəbəkə istifadəçiləri bu yoxluğu artan regional gərginlik, ABŞ-la qarşıdurma riski, İsraillə mümkün hərbi toqquşma və daxildə yenidən alovlana biləcək kütləvi etirazlarla əlaqələndirirlər. Xüsusilə də Xameneyinin yaşının (86) və təhlükəsizlik narahatlıqlarının artması fonunda onun açıq və proqnozlaşdırıla bilən mərasimlərdən uzaq durduğu ehtimal edilir.

Bir çox müşahidəçiyə görə, 19 Bəhməndə görünməmək artıq “ehtiyat” deyil, qorxunun əlamətidir. Rejimin illərlə “qüdrət simvolu” kimi təqdim etdiyi liderin ən vacib günlərdən birində gizlənməsi, İran hakimiyyətinin nə qədər kövrək vəziyyətə düşdüyünü göstərir.

Xameneyinin yoxluğu, güc nümayişi günü kimi tanınan 19 Bəhməni bu dəfə rejimin zəifliyini ifşa edən simvolik tarixə çevirdi.

 

GünAzTV
 

Açar Sözlər :

SEÇİLMİŞ XƏBƏRLƏR

Çox oxunanlar