Xamenei hakimiyyəti oğlunamı həvalə edib?

SON XƏBƏRLƏR

Xamenei hakimiyyəti oğlunamı həvalə edib?

2026.02.11, 15:00

Gunaz.tv

Britaniyanın "The Sun" qəzeti son hesabatlarında iddia edib ki, İran rəhbəri Əli Xamenei gündəlik idarəetmə səlahiyyətlərini oğlu Məsud Xameneiyə həvalə edib və eyni zamanda Tehranda möhkəmləndirilmiş yeraltı sığınacaqda məskunlaşıb.

Məlumata görə, 86 yaşlı Xamenei ABŞ-la artan gərginlik və yüksək rütbəli hərbi şəxslərin mümkün hava zərbəsi barədə xəbərdarlıqlarından sonra paytaxtın müxtəlif nöqtələrinə tunellərlə bağlı olduğu deyilən gizli sığınacağa köçürülüb.

The Sun yazır ki, 53 yaşlı Məsud Xamenei hazırda rəhbərlik ofisini idarə edir və icra hakimiyyəti ilə əsas əlaqə kanalı rolunu oynayır. Bu iddia son həftələrdə İran rəhbərinin bir neçə mühüm ictimai tədbirdə iştirak etməməsi və sosial şəbəkələrdə fəallığının azalması fonunda irəli sürülür.

Xameneinin təhlükəsiz məkana nə vaxt keçdiyi dəqiq məlum deyil. Lakin hesabatlarda onun qəfil səssizliyinin hakimiyyətin zirvəsində təhlükəsizlik və qərarvermə prosesi ilə bağlı ciddi suallar doğurduğu vurğulanır.

Qəzetin yazdığına görə, bu, Xameneinin yeraltı sığınacağa çəkildiyi ilk hal deyil. Ötən il İsraillə baş vermiş 12 günlük müharibə zamanı da onun gizli məkana keçdiyi və hətta öldürüləcəyi təqdirdə mümkün varislərin siyahısını hazırladığı barədə xəbərlər yayılmışdı.

Bəzi təhlilçilər isə hakimiyyət strukturlarına xarici kəşfiyyat orqanlarının sızması ehtimalı ilə bağlı narahatlığın da bu addımın səbəblərindən biri ola biləcəyini bildirirlər.

Əgər gündəlik idarəetmənin Məsud Xameneiyə verilməsi iddiası doğru olarsa, bu, İran rəhbərliyində hakimiyyətin mərhələli şəkildə ötürülməsi prosesinin başladığını göstərə bilər. Regionda artan gərginlik fonunda bu məsələ xüsusi əhəmiyyət daşıyır.

GünAzTV

GUNAZ.TV

SON XƏBƏRLƏR