Contact Us

SON XƏBƏRLƏR

Urmuda Məryəm Cahangirinin adına küçə verildi; Güney Azərbaycanın şairə və qadın haqları öncüsü (Video)

2026.02.20, 21:20
Urmuda Məryəm Cahangirinin adına küçə verildi; Güney Azərbaycanın şairə və qadın haqları öncüsü (Video)

Gunaz.tv

Urmu (Urmiyə) Şəhər Şurasının Tarix Komitəsinin təklifi və təşəbbüsü ilə şəhərin küçələrindən birinə tanınmış şairə, yazıçı və qadın haqları fəalı Məryəm Cahangirinin adı verilib. Ədəbi və ictimai mövqeyinə baxmayaraq uzun illər yetərincə tanıdılmayan bu mədəni simanın adının əbədiləşdirilməsi şəhərin mədəni yaddaşı baxımından mühüm addım kimi qiymətləndirilir.

 

Böhranlı bir dövrdə doğulan istedad
Məryəm Cahangiri 1296-cı ilin 10 Tir tarixində (1 İyul 1917) Urmuda, bölgənin ağır və faciəli günləri – “Ciloluq” hadisələrinin yaşandığı bir zamanda dünyaya gəlib. O, Urmunun tanınmış və nüfuzlu ailələrindən birində böyüyüb. Atası Hüseyn xan Cahangiri – Urmunun məşhur bəylərbəyi və şəhərin ilk bələdiyyə başçısı kimi tarixə düşmüş şəxsiyyətlərdəndir.

Belə bir ailə mühitində yetişən Məryəm xanım erkən yaşlarından ədəbiyyata və sənətə maraq göstərmiş, zəngin mədəni mühitdə formalaşmışdır.

 

Ədəbi yaradıcılığı və ictimai mövqeyi
Məryəm Cahangiri XX əsrin ilk yarısında Güney Azərbaycanda qadınların ictimai səhnəyə çıxmasının çətin olduğu bir dövrdə sözünü cəsarətlə deyən ziyalılardan idi. O, həm Azərbaycan türkcəsində, həm də fars dilində şeirlər yazmış, ədəbi məclislərdə fəal iştirak etmişdir.

Şairə yalnız poeziya ilə kifayətlənməmiş, opera mətnləri və səhnə əsərləri üzərində də çalışmışdır. Onun yaradıcılığında qadın azadlığı, ədalət, milli kimlik və mənəvi dəyərlər əsas mövzulardan olmuşdur. Məryəm Cahangirinin şeirləri lirizmi ilə yanaşı, ictimai həssaslığı ilə də seçilir.

Tədqiqatçılar onu Güney Azərbaycanın erkən dövr qadın ziyalı hərəkatının önəmli simalarından biri kimi dəyərləndirirlər. Onun divanı və şeirləri vəfatından sonra nəşr olunaraq ədəbiyyatsevərlərin ixtiyarına verilmişdir.

 

Erkən vəfat və yarımçıq qalan arzular
Məryəm Cahangiri 1331-ci ilin 7 Şəhrivər tarixində (29 Avqust 1952), cəmi 35 yaşında olarkən, yanlış dərman təyini nəticəsində vəfat edib. Onun vaxtsız ölümü Urmu və ümumilikdə Güney Azərbaycanın mədəni mühitində böyük üzüntü ilə qarşılanmış, bir çox ədəbi və ictimai layihələrinin yarımçıq qalmasına səbəb olmuşdur.

 

Tarixi yaddaşa dönüş
Urmuda küçəyə Məryəm Cahangirinin adının verilməsi, Güney Azərbaycanda qadın ziyalıların və mədəniyyət xadimlərinin tarixdəki yerinin yenidən qiymətləndirilməsi baxımından simvolik əhəmiyyət daşıyır. Bu addım həm də şəhərin mədəni kimliyinə və milli yaddaşına sahib çıxma nümunəsi kimi dəyərləndirilir.

 

GünAzTV

R.G

Açar Sözlər :

SEÇİLMİŞ XƏBƏRLƏR

Çox oxunanlar