Tramp dəmir zərləri atdı

SON XƏBƏRLƏR

Tramp dəmir zərləri atdı

2026.03.01, 07:59

Gunaz.tv

ABŞ-ın İrana qarşı hərbi əməliyyatlara başlaması ilə eyni vaxtda Amerikanın “Atlantik” nəşrində yayımlanan təhlildə Donald Trampın qərarı “dəmir zərləri atmaq” kimi qiymətləndirilib və bu müharibənin mümkün nəticələri araşdırılıb. Məqalədə bildirilir ki, ABŞ prezidenti hücumların məqsədinin İranın nüvə və hərbi potensialının “tamamilə məhv edilməsi”, eləcə də İslam Respublikasının hakimiyyətinin sona çatdırılması olduğunu açıqlayıb.

Təhlildə qeyd olunur ki, İranın nüvə proqramının sıradan çıxarılması, raket və pilotsuz uçuş aparatları imkanlarının zəiflədilməsi, həmçinin bölgədəki proksi qüvvələrinin təsirsiz hala gətirilməsi təhlükəsizlik baxımından müsbət addım kimi dəyərləndirilə bilər. Eyni zamanda vurğulanır ki, İranda yaşayan insanların böyük hissəsi mövcud hakimiyyətdən narazıdır və illərdir yoxsulluq, repressiya və sistemli zorakılıqla üz-üzədir.

Tramp Floridadakı iqamətgahından etdiyi çıxışda ənənəvi rəsmi formatdan kənar şəkildə maksimal hədəflər elan edib. O, İranın raket sənayesinin tamamilə dağıdılacağını, hərbi dəniz qüvvələrinin məhv ediləcəyini, bölgədəki silahlı qrupların zərərsizləşdiriləcəyini və İranın heç vaxt nüvə silahı əldə etməsinə imkan verilməyəcəyini bildirib.

ABŞ prezidenti müraciətində İranda yaşayan insanlara səslənərək “azadlıq saatının çatdığını” deyib və hücumlar başa çatdıqdan sonra hakimiyyəti ələ almağa çağırıb. O, bu anı “bəlkə də bir neçə nəsil üçün yeganə fürsət” adlandırıb və ABŞ-ın “dağıdıcı güclə” dəstək verəcəyini vurğulayıb.

“Atlantik”də dərc olunan təhlildə diqqətə çatdırılır ki, elan edilən məqsədlər təkcə nüvə və hərbi infrastrukturla məhdudlaşmır, faktiki olaraq İranın siyasi sisteminin tam dəyişdirilməsini nəzərdə tutur. Müəllif xatırladır ki, təxminən 90 milyon əhalisi olan, geniş coğrafiyaya və Rusiya ilə Çinlə yaxın əlaqələrə malik bir ölkəyə qarşı belə miqyaslı müharibə gözlənilməz və uzunmüddətli nəticələr doğura bilər.

Müşahidəçilər hesab edirlər ki, maksimalist hədəflərlə başlanan bu əməliyyat bölgədə yeni və daha mürəkkəb təhlükəsizlik mərhələsinin başlanğıcı ola bilər.

GünAzTV
R.G

GUNAZ.TV

SON XƏBƏRLƏR