Eksklüziv | ABŞ Hörmüz boğazında neft tankerlərini hərbi müşayiətə götürəcək

SON XƏBƏRLƏR

Eksklüziv | ABŞ Hörmüz boğazında neft tankerlərini hərbi müşayiətə götürəcək

2026.03.04, 07:53

Gunaz.tv

Vaşinqtondan yayılan rəsmi məlumatlara görə, ABŞ Prezidenti Donald Tramp sosial şəbəkə platformasında paylaşdığı mesajda bildirib ki, zərurət yaranacağı təqdirdə ABŞ Hərbi Dəniz Qüvvələri Hörmüz boğazından keçən neft tankerlərinin təhlükəsizliyini təmin etmək üçün onları hərbi müşayiətə götürəcək.

Tramp qeyd edib ki, dərhal qüvvəyə minən göstərişə əsasən ABŞ İnkişafın Maliyyələşdirilməsi Korporasiyasına dəniz ticarəti, xüsusilə də Körfəzdən keçən enerji daşımaları üçün münasib qiymətlə siyasi risk sığortası və maliyyə zəmanətləri təqdim etmək tapşırılıb. Onun sözlərinə görə, bu mexanizm bütün gəmiçilik şirkətləri üçün açıq olacaq.

ABŞ Prezidenti vurğulayıb ki, “zəruri olarsa, ABŞ Hərbi Dəniz Qüvvələri ən qısa zamanda Hörmüz boğazında tankerlərin müşayiətinə başlayacaq” və Vaşinqton qlobal enerji axınının sərbəstliyini təmin edəcək. O əlavə edib ki, ABŞ-ın iqtisadi və hərbi gücü dünyada ən yüksək səviyyədədir və əlavə addımlar da nəzərdə tutulur.

Bu bəyanat son günlər SEPAH tərəfindən səsləndirilən təhdidlər fonunda verilib. Beynəlxalq media orqanlarının məlumatına görə, İran tərəfi bölgədə artan hərbi gərginlik şəraitində Hörmüz boğazının bağlana biləcəyi və ya bölgədən keçən gəmilərin hədəfə alına biləcəyi ilə bağlı xəbərdarlıq edib.

Məlumatlara əsasən, yaranmış risklər səbəbindən Hörmüz boğazında gəmi hərəkəti kəskin azalıb, bəzi sığorta şirkətləri müharibə riskləri ilə bağlı təminatları dayandırıb və dünya bazarlarında neftin qiymətində ciddi artım müşahidə olunub.

Hörmüz boğazı qlobal enerji təhlükəsizliyi baxımından strateji əhəmiyyət daşıyır. Dünyada gündəlik istehsal olunan neftin təxminən 20 faizi bu marşrut vasitəsilə daşınır. Boğazın bağlanması enerji bazarlarında ciddi böhrana və qiymətlərin kəskin yüksəlməsinə səbəb ola bilər.

Trampın açıqladığı tədbirlər iki əsas istiqaməti əhatə edir:

* - Birincisi, siyasi risk sığortası və maliyyə zəmanətləri vasitəsilə gəmiçilik şirkətlərinə əlavə təminatın verilməsi. Bu addımın məqsədi enerji daşımalarının fasiləsiz davam etməsini təmin etməkdir.

* - İkincisi, ehtiyac yaranacağı halda ABŞ Hərbi Dəniz Qüvvələrinin tankerləri birbaşa hərbi müşayiətə götürməsi. Bu model 1980-ci illərdə bölgədə yaşanan qarşıdurmalar zamanı tətbiq olunan müşayiət əməliyyatlarını xatırladır.

Beynəlxalq informasiya agentlikləri, o cümlədən Reuters və digər nüfuzlu media qurumları bu bəyanatı Vaşinqtonun bölgədə artan risklərə qarşı ən sərt mesajlarından biri kimi qiymətləndirib. Mesajın yayılmasından sonra enerji bazarlarında nisbi sabitləşmə müşahidə olunub.

GünAzTV
R.G

GUNAZ.TV

SON XƏBƏRLƏR