Hörmüzda neft tankerlərinin müşayiəti tələbi artır

SON XƏBƏRLƏR

Hörmüzda neft tankerlərinin müşayiəti tələbi artır

2026.03.12, 10:08

İranın Hörmüz boğazında ticarət gəmilərinə hücumları artdıqca, hərbi gəmilərin müşayiəti ilə dəniz mühafizə sisteminin yaradılması tələbləri də güclənir.

Gunaz.tv

İran qüvvələrinin ticarət gəmilərinə hücumlarının artmasından sonra Hörmüz boğazında dəniz mühafizə sistemi yaradılması ilə bağlı çağırışlar artır. Analitiklər bildirirlər ki, bu hücumlar dünyanın ən həyati enerji nəqli marşrutlarından birinin təhlükəsizliyini ciddi şəkildə təhdid edir.

Bu arada ABŞ ordusunun Mərkəzi Komandanlığı xəbərdarlıq edib ki, İran hakimiyyəti Hörmüz boğazı ətrafındakı mülki limanlardan hərbi əməliyyatlar üçün istifadə edir. Bu addım beynəlxalq gəmiçiliyin təhlükəsizliyini təhdid edir və gəmi heyətlərinin həyatını risk altına qoyur.

Rəsmilərin məlumatına görə, çərşənbə günü bölgədə ən azı beş yük gəmisi hücuma məruz qalıb. Digər bir hadisədə isə iki raket Oman sahillərinin şimalında ilişib qalan konteyner gəmisinə kömək edən BƏƏ bayraqlı bir yedək gəmisinə dəyib. Bu hücum nəticəsində ən azı dörd dənizçi həyatını itirib.

Təhdidlərin artdığı bir vaxtda ölkələr neft ixracını bərpa etməyə çalışırlar. Hörmüz boğazı normal şəraitdə dünya neft tədarükünün təxminən iyirmi faizinin keçdiyi əsas marşrut hesab olunur. Lakin son məlumatlara görə hazırda bu marşrutdan keçən gəmi trafiki demək olar ki, sıfıra enib.

Eyni zamanda ABŞ ordusu son əməliyyatlar zamanı İranın mina yerləşdirmək üçün istifadə etdiyi on altı hərbi gəmini məhv etdiyini açıqlayıb. Bununla belə, İranın bu strateji su yolunda mina yerləşdirməyə hazırlaşdığı barədə narahatlıqlar qalmaqdadır.

Dəniz təhlükəsizliyi üzrə mütəxəssislər bildirirlər ki, İran qüvvələri raket və partlayıcılarla təchiz olunmuş sürətli qayıqlardan istifadə edərək gəmilərə sürətli hücumlar həyata keçirə bilər. Bu şəraitdə ticarət gəmilərinin hərbi gəmilər tərəfindən müşayiət edilməsi ilə bağlı çağırışlar daha da artır. Bununla belə Ağ Ev bildirir ki, ABŞ Hərbi Dəniz Qüvvələri indiyədək bu marşrutda heç bir tanker və ya gəmini müşayiət etməyib.

Ağ Evin sözçüsü vurğulayıb ki, gəmilərin müşayiəti hələ də prezident Trampın zəruri hesab etdiyi halda istifadə edə biləcəyi variantlardan biridir.

Vaşinqton hökuməti və enerji sahəsi rəsmiləri Hörmüz boğazını açıq saxlamaq üçün müxtəlif variantları nəzərdən keçirirlər. Bununla belə bəzi gəmiçilik şirkətləri bu marşrutdan istifadə etməkdən çəkinə bilər, çünki bu su yolu olduqca dar hesab olunur və burada dəniz minalarının yerləşdirilməsi nisbətən asandır.

GünAzTV
R.G

GUNAZ.TV

SON XƏBƏRLƏR