Neft qiymətləri ikinci gündür ardıcıl ucuzlaşır

SON XƏBƏRLƏR

Neft qiymətləri ikinci gündür ardıcıl ucuzlaşır

2026.05.07, 21:11

Gunaz.tv

Gunaz TV-nin yaydığı məlumata görə, ABŞ ilə İran arasında müharibənin dayandırılması və Hörmüz boğazının yenidən açılması ilə bağlı razılaşma ehtimalının güclənməsi fonunda dünya bazarlarında neft qiymətləri ikinci gündür ardıcıl olaraq aşağı düşüb. Eyni zamanda Asiya, Avropa və ABŞ birjalarında səhmlər bahalaşıb.

Cümə axşamı keçirilən ticarətdə xam neftin qiyməti daha 5 faiz ucuzlaşıb və “Brent” markalı neftin bir bareli 100 dolların altına enib. Bundan əvvəl çərşənbə günü də neft qiymətləri təxminən 10 faiz geriləmişdi.

Asiya və Avropa bazarlarında səhmlərin dəyəri artıb. Nyu-York birjasının əsas indeksləri olan “S&P 500” və “Dow Jones” da əvvəlki rekord səviyyələrinə yaxınlaşıb.

ABŞ prezidenti Donald Tramp çərşənbə axşamı bildirib ki, son 24 saat ərzində aparılan “çox yaxşı danışıqlardan” sonra İranla müharibəni dayandıracaq razılaşmanın əldə olunması “çox mümkün” görünür.

Bundan əvvəl Axios və Reuters kimi media qurumları Tehran və Vaşinqtonun münaqişənin sona çatdırılması üçün bir səhifəlik memorandum üzərində razılığa yaxınlaşdıqlarını yazmışdılar.

Neft qiymətlərindəki kəskin eniş dünya bazarlarının Hörmüz boğazında vəziyyətin sabitləşəcəyinə və enerji ixracının tam bərpa olunacağına inandığını göstərir.

Tehran və Vaşinqton arasında danışıqların davam etməsi qlobal bazarlarda müharibədən qaynaqlanan inflyasiya təzyiqini azalda bilər. Bununla belə, danışıqların uğursuzluqla nəticələnməsi ehtimalı ilə bağlı narahatlıqlar hələ də qalır.

GünAzTV
R.G

GUNAZ.TV

SON XƏBƏRLƏR