İsrail İraqda gizli baza qurub

SON XƏBƏRLƏR

İsrail İraqda gizli baza qurub

2026.05.10, 15:01

“Wall Street Journal”: İsrail İranla son müharibədən əvvəl İraqda gizli baza yaradıb.

Gunaz.tv

Gunaz TV-nin yaydığı məlumata görə, “Wall Street Journal” qəzeti İsrailin İranla son müharibədən əvvəl İraqın qərb səhrasında gizli hərbi baza yaratdığını yazıb.

Qəzetin şənbə günü yayımladığı xüsusi hesabatda bildirilir ki, ABŞ rəsmiləri də daxil olmaqla məlumatlı mənbələrin sözlərinə görə, bu baza müharibə başlamazdan qısa müddət əvvəl ABŞ-ın məlumatı ilə yaradılıb və İran əleyhinə hava əməliyyatlarının dəstəklənməsi üçün istifadə olunub.

Məlumata əsasən, bazada İsrailin xüsusi təyinatlı qüvvələri və hava qüvvələrinin logistika dəstək mərkəzi yerləşib. Həmçinin vurulan İsrail pilotlarının xilas edilməsi üçün axtarış-xilasetmə qrupları da burada yerləşdirilib.

Hesabatda qeyd olunur ki, mart ayının əvvəlində yerli bir çoban bölgədə qeyri-adi hərbi fəaliyyət və helikopter uçuşları barədə məlumat verdikdən sonra İraq ordusu əraziyə qüvvə göndərib. Lakin İsrail hava hücumları ilə onların irəliləməsinin qarşısını alıb.

İraq hökuməti həmin vaxt bir iraqlı əsgərin ölümü ilə nəticələnən hücumu pisləmiş və BMT-yə təqdim etdiyi şikayətdə hücumun xarici qüvvələrin iştirakı və hava əməliyyatları ilə həyata keçirildiyini bildirərək ABŞ-ı məsul saymışdı.

İsrail ordusu və İraq hökuməti isə xəbərlə bağlı şərh verməkdən imtina edib.

Hərbi və təhlükəsizlik ekspertləri bildirirlər ki, hərbi əməliyyatlardan əvvəl müvəqqəti əməliyyat bazalarının yaradılması ABŞ qüvvələri üçün adi təcrübədir.

“Wall Street Journal” yazır ki, ABŞ da əvvəllər İran daxilində oxşar müvəqqəti baza yaratmış və bu baza İsfahan yaxınlığında vurulan amerikalı pilotların xilas edilməsində istifadə olunmuşdu.

“Horizon Engage” Strateji Araşdırmalar Mərkəzinin tədqiqat rəhbəri Maykl Nayts bildirib ki, İraqın qərb səhrası geniş əraziyə və az əhaliyə malik olduğu üçün belə bazalar üçün əlverişli bölgə hesab olunur. ABŞ xüsusi təyinatlı qüvvələri də 1991 və 2003-cü illərdə Səddam Hüseynə qarşı əməliyyatlarda bu bölgədən istifadə etmişdi.

GünAzTV
R.G

GUNAZ.TV

SON XƏBƏRLƏR