Müctəba Xameneidən yeni əməliyyat əmri

SON XƏBƏRLƏR

Müctəba Xameneidən yeni əməliyyat əmri

2026.05.10, 17:50

Fars: Müctəba Xamenei əməliyyatların davam etdirilməsi barədə göstəriş verib.

Gunaz.tv

İrana bağlı “Fars” xəbər agentliyi bazar günü yayımladığı məlumatda bildirib ki, İranın yeni rəhbəri Müctəba Xamenei İnqilab Keşikçiləri Korpusunun general-polkovniki Əli Abdullahi ilə görüşdə “əməliyyatların davam etdirilməsi və düşmənlərə qarşı qətiyyətli mübarizə” barədə yeni göstərişlər verib.

Agentliyin məlumatına görə, Əli Abdullahi yeni tapşırıqları Müctəba Xameneidən aldığı görüş zamanı qəbul edib.

Məlumata əsasən, Abdullahi görüşdə Müctəba Xameneiyə “İran silahlı qüvvələrinin hazırlıq səviyyəsi” barədə hesabat təqdim edib.

Görüşün keçirildiyi vaxtı açıqlamayan “Fars” agentliyi Abdullahidən belə sitat gətirib: “Silahlı qüvvələr ABŞ və İsrailin hər hansı addımına qarşı tam hazırlıq vəziyyətindədir.”

Abdullahi əlavə edib: “Düşmən tərəfindən hər hansı səhv addım atılarsa, İranın cavabı sürətli və qəti olacaq.”

İran dövlət televiziyasının yaydığı mətnə əsasən, görüşün dəqiq vaxtı açıqlanmayıb və əlavə detallar təqdim edilməyib.

Bundan əvvəl 40 günlük müharibənin ilk günündə baş verən hava hücumları zamanı Müctəba Xameneinin yaralandığı barədə xəbərlər yayılmışdı. Həmin hücumlarda onun atası və İranın əvvəlki rəhbəri Əli Xameneinin öldürüldüyü bildirilmişdi.

Mart ayının əvvəlində hakimiyyətə gətirilən Müctəba Xamenei indiyədək ictimaiyyət qarşısına çıxmayıb və onun mesajları yalnız yazılı bəyanatlar vasitəsilə yayımlanır.

Bu arada İran ordusunun sözçüsü Məhəmməd Kərəmi Nia də bu gün yaydığı açıqlamada ABŞ-ın yenidən İrana hücum edəcəyi halda cavabın “yeni silahlar, yeni döyüş üsulları və yeni müharibə meydanları” ilə veriləcəyini bildirib.

“Fars” agentliyi İran ordusunun sözçüsünə istinadən yazıb ki, ABŞ sanksiyalarına qoşulan ölkələrin gəmiləri bundan sonra Hörmüz boğazından keçid zamanı problemlərlə üzləşəcək.

GünAzTV
R.G

GUNAZ.TV

SON XƏBƏRLƏR