Çin ABŞ-la eyni mövqedədir; İran “heç vaxt” nüvə silahı əldə etməməlidir

SON XƏBƏRLƏR

Çin ABŞ-la eyni mövqedədir; İran “heç vaxt” nüvə silahı əldə etməməlidir

2026.05.14, 19:32

Gunaz.tv

Gunaz TV-nin məlumatına görə, Ağ Ev Donald Tramp və Si Cinpinin Pekində keçirilən görüşdə İranın “heç vaxt” nüvə silahı əldə etməməsi barədə razılığa gəldiyini açıqlayıb. Bu mövqe Pekinin İranla bağlı ən həssas strateji məsələlərdən birində Tehrandan uzaqlaşdığına işarə kimi qiymətləndirilir.

Ağ Evin mayın 14-də yaydığı bəyanata görə, Çin lideri Si Cinpin ölkəsinin “Hörmüz boğazının hərbiləşdirilməsinə” və bu marşrutdan keçən gəmilərdən rüsum alınması cəhdlərinə qarşı olduğunu bildirib.

Ağ Ev həmçinin qeyd edib ki, tərəflər qlobal enerji axınının təmin olunması üçün Hörmüz boğazının açıq qalmasının vacibliyi barədə də razılığa gəliblər. Bu mövqe bölgədəki son gərginlik fonunda İranın siyasəti ilə birbaşa əlaqələndirilir.

Bəyanatın digər hissəsində bildirilir ki, Si Cinpin gələcəkdə Çinin Hörmüz boğazından asılılığını azaltmaq üçün ABŞ neftinin alışını artırmağa maraq göstərib. Bu, illərdir İranı əsas iqtisadi və siyasi tərəfdaşlarından biri kimi təqdim edən Tehran üçün diqqətçəkən dəyişiklik kimi görünür.

Çin son illərdə iqtisadi və diplomatik sahədə İranın ən yaxın tərəfdaşlarından biri olub və sanksiyalar dövründə İran neftinin əsas alıcılarından sayılırdı. Lakin Ağ Evin son bəyanatı göstərir ki, Pekin İranın nüvə dosyesində, ən azı rəsmi mövqe baxımından, Vaşinqtonla eyni xəttə yaxınlaşıb.

Tramp və Si Cinpin görüşdə ABŞ-a fentanil istehsalı üçün xammal axınının qarşısının alınması və Çinin ABŞ kənd təsərrüfatı məhsullarının alışını artırması məsələlərini də müzakirə ediblər.

GünAzTV
R.G

GUNAZ.TV

SON XƏBƏRLƏR