ABŞ: Müharibə bitdi, yeni hədəf Hörmüzdür

SON XƏBƏRLƏR

ABŞ: Müharibə bitdi, yeni hədəf Hörmüzdür

2026.05.17, 18:10

ABŞ Nümayəndələr Palatasının sədri: Vaşinqtonun növbəti layihəsi Hörmüz boğazını açmaqdır.

Gunaz.tv

ABŞ İranla müharibənin başa çatdığını bildirsə də, Hörmüz böhranının hələ də gündəmdə qaldığını açıqlayıb.

Gunaz TV-nin məlumatına görə, ABŞ Nümayəndələr Palatasının sədri Mayk Conson bazar günü bildirib ki, İranla bağlı “Epik qəzəb” adlandırılan hərbi əməliyyat başa çatıb və Vaşinqtonun yeni diqqət mərkəzi Hörmüz boğazının yenidən açılmasıdır.

Conson Fox News-a müsahibəsində demokratların Donald Tramp administrasiyasını İranla mümkün hərbi əməliyyatların davamı üçün Konqresdən icazə almağa məcbur etmək cəhdlərinə cavab olaraq deyib: “Müharibə səlahiyyətləri qanununu gündəmə gətirməyin vaxtı deyil. Bildirilib ki, "Epik qəzəb" əməliyyatı başa çatıb və vəziyyət də məhz belədir. İndi yeni layihəyə keçmişik və bu, Hörmüz boğazının açılmasıdır.”

Pentaqon daha əvvəl ABŞ-ın İrana qarşı hücumlarını “Epik qəzəb” adı ilə təqdim etmişdi. Lakin Tramp administrasiyasının rəsmiləri bu əməliyyatın artıq başa çatdığını və onun davamı üçün Konqresdən yeni icazəyə ehtiyac olmadığını bildirirlər.

Demokratların Tramp administrasiyasının İranla bağlı səlahiyyətlərini məhdudlaşdırmaq üçün Senatda etdiyi bir neçə cəhd də uğursuz olub.

Donald Tramp mayın 4-də Hörmüz boğazında ilişib qalan gəmiləri çıxarmaq üçün “Azadlıq layihəsi” əməliyyatına start vermişdi. Lakin bu əməliyyat iki gün sonra İranla danışıqları davam etdirmək məqsədilə dayandırılmışdı.

Mayk Conson həmçinin iddia edib ki, Hörmüz boğazının açılması “diplomatiya və danışıqlar” yolu ilə həyata keçirilir və bu çərçivədə yeni hərbi toqquşma baş verməyib.

O əlavə edib ki, Tramp administrasiyasına bu böhran üçün həll yolu tapmaq məqsədilə vaxt vermək lazımdır.

Bu arada İran müharibənin başlanmasından bəri Hörmüz boğazını bağlayıb. ABŞ isə atəşkəsdən və Pakistanda keçirilən uğursuz danışıqlardan sonra İrana qarşı dəniz blokadasına başlayıb və bu vəziyyət hələ də davam edir.

GünAzTV
R.G

GUNAZ.TV

SON XƏBƏRLƏR