ABŞ-ın İranla razılaşma üçün 5 əsas şərti

SON XƏBƏRLƏR

ABŞ-ın İranla razılaşma üçün 5 əsas şərti

2026.05.17, 23:18

Vaşinqton Tehranla mümkün razılaşma üçün əsas tələblərini müəyyənləşdirib.

Gunaz.tv

Gunaz TV-nin məlumatına görə, SEPAH-a yaxın Fars xəbər agentliyi iddia edib ki, ABŞ İranla mümkün danışıqlar çərçivəsində beş əsas şərt irəli sürüb; bu tələblərin əsas məqsədinin İranın nüvə proqramını tam nəzarət altına almaq və Tehranın təzyiq alətlərini zəiflətmək olduğu bildirilir.

Farsın iddiasına görə, ABŞ-ın şərtləri bunlardır:

1- Təzminat ödənilməyəcək
Vaşinqtonun İrana heç bir kompensasiya və ya müharibə zərəri ödəməyəcəyi bildirilir.

2- Uran ehtiyatları İrandan çıxarılmalıdır
Məlumata görə, ABŞ İranda mövcud olan təxminən 400 kiloqram uranın ölkədən çıxarılıb Amerikaya təhvil verilməsini tələb edir.

3- Nüvə obyektləri ciddi şəkildə məhdudlaşdırılmalıdır
Fars iddia edir ki, ABŞ yalnız bir nüvə obyektinin aktiv qalmasını, digər bütün nüvə imkanlarının dayandırılmasını istəyir.

4- Dondurulmuş aktivlər azad edilməyəcək
Xəbərə görə, Vaşinqton İranın dondurulmuş vəsaitlərinin hətta 25 faizinin belə azad edilməsinə razı olmayıb.

5- Atəşkəs danışıqlardan asılı olacaq
İddia olunur ki, bütün cəbhələrdə qarşıdurmaların dayandırılması yalnız danışıqlarda irəliləyiş və razılaşma əldə olunacağı halda mümkün olacaq.

Fars həmçinin yazıb ki, İran da danışıqlara başlamaq üçün öz şərtlərini irəli sürüb. Bunlara bütün cəbhələrdə müharibənin dayandırılması, sanksiyaların ləğvi, dondurulmuş vəsaitlərin azad edilməsi, müharibə zərərlərinin ödənilməsi və İranın Hörmüz boğazı üzərində suverenliyinin qəbul edilməsi daxildir.

Bu arada Donald Tramp daha əvvəl bildirmişdi ki, İran nüvə silahına sahib olmayacağına dair real zəmanət verməlidir.

ABŞ prezidenti həmçinin demişdi ki, Tehran 20 il müddətinə nüvə proqramını dayandırmalı, bütün nüvə yanacağını ölkədən çıxarmalı və bu proqramla bağlı bütün fəaliyyətləri dayandırmalıdır.

Tramp son açıqlamasında da xəbərdarlıq edib ki, əgər İran razılaşmaya getməsə, “çox pis vəziyyətlə” üzləşəcək.

GünAzTV
R.G

GUNAZ.TV

SON XƏBƏRLƏR