İsrail rəsmiləri bildirirlər ki, İranın ABŞ-ın təklifinə verdiyi yeni cavabdan sonra Tehranla hərbi qarşıdurmanın yenidən başlaması ehtimalı ciddi şəkildə artıb və hərbi seçim indi əvvəlkindən daha çox gündəmdədir.

Gunaz TV-nin xəbərinə görə, İsrail rəsmiləri İranın Donald Trampın təklifinə verdiyi cavabı “rüsvayçı” adlandırır və bunun danışıqlarda irəliləyiş üçün əsas ola bilməyəcəyini düşünürlər.

Donald Tramp New York Post-a müsahibəsində deyib: “Mən İranın davranışından məyus deyiləm.” O əlavə edib: “Hazırda heç nəyə açıq deyiləm. Bu barədə sizinlə həqiqətən danışa bilmərəm. Çox şey baş verir. Sizə deyə bilərəm ki, onlar indi razılaşma əldə etməyi hər zamankından daha çox istəyirlər, çünki yaxın zamanda nə baş verəcəyini bilirlər. Bu bir danışıqdı. Mən axmaq olmaq istəmirəm.”

İsrail rəsmiləri bildirirlər ki, Təl-Əviv mümkün ssenarilərlə bağlı planlaşdırmada iştirak edir, amma yekun qərarın hələ də Trampdan asılı olduğunu və hər hansı addımın dəqiq vaxtının bəlli olmadığını deyirlər.

Bir İsrail rəsmisinin sözlərinə görə, İran Trampın hərbi əməliyyata yaxınlaşdığını hiss edərsə, son anda müəyyən elastiklik göstərə bilər; amma hazırda buna dair heç bir əlamət görünmür.

Məlumatlı mənbə iddia edib: “İranlılar Trampa heç nə verməyə hazır deyillər, çünki onun müharibəni bitirmək üçün çıxılmaz vəziyyətdə olduğunu düşünürlər. Onların gündəliyi Trampı alçaltmaq və dünyanın ən böyük gücünü məğlub etdiklərini göstərməkdir.”

Məlumata görə, Donald Tramp çərşənbə axşamı müşavirləri ilə görüş keçirərək növbəti addımlarla bağlı qərar verəcək. Eyni zamanda, Benyamin Netanyahu da ardıcıl ikinci gündür daxili kabinet iclası keçirib.

ABŞ-dan yüksəkvəzifəli bir rəsmi Axios-a açıqlamasında İranın cavabını “yetərsiz” adlandırıb və bildirib ki, Tehran mövqeyini dəyişməsə, Vaşinqton danışıqları “bombalar vasitəsilə” davam etdirməli olacaq.

İsrail rəsmiləri hesab edirlər ki, İranın davranışını nəzərə alsaq, məhdud hərbi əməliyyat artıq təsirli olmaya bilər və Tramp daha genişmiqyaslı müharibəyə girmək məcburiyyətində qala bilər.

Bir İsrail rəsmisi deyib: “İsrail müharibənin tam şəkildə yenidən başlamasına hazır olmalıdır. Bunun ehtimalı artıq 50 faizdən çoxdur, amma yekun qərar hələ verilməyib. Tramp son anda bunu təxirə salmaq üçün səbəb tapa bilərmi? Bəli. Amma sonda dərhal döyüşlərin yenidən başlanmasına qərar verə də bilər.”

Xəbərdə bildirilir ki, müzakirə olunan variantlar yalnız hava hücumları ilə məhdudlaşmır. Quru əməliyyatı, Xarg adasının ələ keçirilməsi, zənginləşdirilmiş uran ehtiyatlarının çıxarılması və Hörmüz boğazına nəzarətin ələ alınması da mümkün ssenarilər arasındadır.

Reuters isə yüksəkvəzifəli İran rəsmisinə istinadla yazıb ki, Tehran əvvəlki mövqeyinə uyğun olaraq, nüvə məsələlərini yalnız sonrakı mərhələlərdə müzakirə etməyə hazırdır.
.

GünAzTV
R.G