Contact Us

SON XƏBƏRLƏR

Azərbaycan metan emissiyalarının azaldılması üçün geniş proqram həyata keçirir

2026.06.05, 17:36
Azərbaycan metan emissiyalarının azaldılması üçün geniş proqram həyata keçirir

Azərbaycan iqlim dəyişikliyinə səbəb olan ən güclü istixana qazlarından biri hesab edilən metan emissiyalarının azaldılması istiqamətində genişmiqyaslı tədbirlər həyata keçirir.

Gunaz.tv

Bu barədə Birləşmiş Millətlər Təşkilatının Ətraf Mühit Proqramının rəsmi saytındakı hesabatda qeyd edilib.

Məlumata görə, Azərbaycan Dövlət Neft Şirkəti (SOCAR) 2024-cü ildən etibarən metan sızmalarını minimuma endirməyi hədəfləyən yeni proqram başladıb. Şirkət rəhbərliyi növbəti on il ərzində metan emissiyalarını demək olar ki, tamamilə aradan qaldırmağı planlaşdırır.

SOCAR-ın Enerji Keçidi, Ətraf Mühit və Dekarbonizasiya üzrə vitse-prezident müavini Hikmət Abdullayev bildirib ki, şirkət son illərdə karbon izinin azaldılmasına və ekoloji layihələrə böyük resurslar ayırıb.

Azərbaycanın neft-qaz infrastrukturunun əhəmiyyətli hissəsi sovet dövründən qaldığı üçün köhnə boru xətləri və avadanlıqlarda metan sızmaları müşahidə olunur. Bu problemi aradan qaldırmaq üçün SOCAR peyk görüntülərindən, xüsusi qaz aşkarlama kameralarından, metan sensorları ilə təchiz olunmuş pilotsuz uçuş aparatlarından və süni intellekt texnologiyalarından istifadə edir.

Şirkət bildirir ki, aparılan monitorinqlər nəticəsində çoxsaylı sızmalar aşkar edilərək aradan qaldırılıb. Bu il 80-dən çox qurğunun dronlarla yoxlanılması planlaşdırılır.

SOCAR 2024-cü ilin avqust ayında BMT-nin Ətraf Mühit Proqramının (UNEP) Neft və Qaz Metan Tərəfdaşlığına (OGMP 2.0) qoşulub. Təşkilatın nümayəndələri Azərbaycanın bu addımını region üçün mühüm nümunə kimi qiymətləndiriblər.

Mütəxəssislərin fikrincə, metan emissiyalarının azaldılması həm iqlim dəyişikliyi ilə mübarizəyə töhfə verir, həm də iqtisadi baxımdan sərfəlidir. Çünki atmosferə buraxılmayan qaz yenidən sistemə qaytarılaraq kommersiya məqsədilə istifadə oluna bilər.

Qeyd edək ki, metan qlobal istiləşmənin əsas səbəblərindən biri hesab olunur və hazırda dünyada müşahidə edilən temperatur artımının təxminən üçdə birinin bu qazla əlaqəli olduğu bildirilir.

 

Qaynaq: https://www.unep.org/news-and-stories/story/how-azerbaijan-cracking-down-one-especially-potent-greenhouse-gas

 

C

Açar Sözlər :

SEÇİLMİŞ XƏBƏRLƏR

Çox oxunanlar