Hizbullahın hücumları bölgədə gərginliyi artırdı; Təl-Əvivdən sərt mesaj: əməliyyat başlayır

SON XƏBƏRLƏR

Hizbullahın hücumları bölgədə gərginliyi artırdı; Təl-Əvivdən sərt mesaj: əməliyyat başlayır

2026.06.14, 12:40

İsrail Hizbullaha qarşı əməliyyatlar öncəsi Cənubi Livandakı 29 yaşayış məntəqəsi üçün təxliyə xəbərdarlığı edib.

Gunaz.tv

İsrail ordusu bazar günü Cənubi Livandakı 29 kənd və şəhərin sakinlərinə xəbərdarlıq edərək, terrorçu Hizbullah qruplaşmasına qarşı planlaşdırılan əməliyyatlardan əvvəl ərazini tərk etmələrini istəyib.

İsrail ordusunun açıqlamasına görə, 16 yaşayış məntəqəsinin sakinlərinə olduqları ərazidən ən azı bir kilometr uzaqlaşmaq göstərişi verilib. Daha 13 şəhərin sakinlərinə isə Zəhrani çayının şimalına keçmək tapşırılıb.

İsrail ordusunun sözçüsü polkovnik Avixay Ədrəi bildirib: “Hizbullahın atəşkəs razılaşmasını pozmasını nəzərə alaraq, İsrail ordusu ona qarşı qətiyyətlə hərəkət etməyə məcburdur.”

Eyni zamanda İsrail ordusu İsrail hava məkanını pozan iki pilotsuz uçuş aparatının Qərbi Qalileya bölgəsində düşərək partladığını açıqlayıb. Hadisə nəticəsində insan tələfatının olmadığı bildirilib.

İsrail Radiosu israilli mənbələrə istinadən xəbər verib ki, sözügedən pilotsuz aparatları Livan ərazisindən buraxılıb və onların hədəfi Ras ən-Naqura yaxınlığındakı hərbi bazalar olub.

Mənbələr əlavə ediblər ki, son iki gün ərzində Hizbullaha məxsus dörd pilotsuz aparat İsrail daxilindəki hədəflərə çatıb.

Hadisələr ABŞ və İran arasında müharibənin dayandırılması məqsədilə bazar günü qeyri-birbaşa formada memorandum imzalanacağı ilə bağlı gözləntilərin artdığı bir vaxtda baş verir.

İran tərəfi əvvəlki mərhələlərdə Livan məsələsinin ABŞ və İran arasında mümkün razılaşmanın bir hissəsi olmalı olduğunu vurğulasa da, Təl-Əviv bu mövqeni rədd edib və İran dosyesi ilə Livan dosyesinin bir-birindən ayrı tutulmalı olduğunu bildirib.

GünAzTV
R.G

GUNAZ.TV

SON XƏBƏRLƏR