Qızılhisar həbsxanasında siyasi məhbusların hüquqlarının pozulması ilə bağlı yeni hesabat

SON XƏBƏRLƏR

Qızılhisar həbsxanasında siyasi məhbusların hüquqlarının pozulması ilə bağlı yeni hesabat

2026.07.07, 20:35

Gunaz.tv

Gunaz TV-nin məlumatına görə, insan haqları təşkilatları çərşənbə axşamı Qızılhisar həbsxanasının 3-cü korpusunun 37-ci bölməsində saxlanılan siyasi məhbusların vəziyyəti ilə bağlı hesabat yayıb. Hesabatda məhbusların hüquqlarının pozulduğu, qeyri-insani şəraitdə saxlanıldığı və psixoloji təzyiqlərə məruz qaldığı bildirilib.

Hesabata əsasən, 1404-cü ilin dey ayında (2026 yanvar ayında) keçirilən ümumxalq etirazları zamanı saxlanılan təxminən 100 nəfər bu bölmədə saxlanılır və onlar ciddi məhdudiyyətlər, eləcə də cəza xarakterli rəftarla üzləşirlər.

İran İnsan Haqları Mərkəzi məhbusların hüquqlarının pozulması ilə bağlı aşağıdakı halları sadalayıb:

1. Ailə üzvləri ilə telefon əlaqəsinin qadağan edilməsi.
2. Görüş hüququndan məhrum edilmələri.
3. Gəzintiyə (hava almağa) çıxmaq imkanının məhdudlaşdırılması və ya tamamilə qadağan olunması.
4. Həbsxananın mağazasından zəruri ehtiyacların alınmasına maneə yaradılması.
5. Zəruri dərmanların içəri buraxılmasına icazə verilməməsi.
6. Həbsxana əməkdaşları tərəfindən psixoloji təzyiq, zorakılıq və pis rəftar.
7. Digər məhbuslar və ailə üzvləri ilə əlaqələrin kəsilməsi və ya minimuma endirilməsi.
8. Yataq yeri, çarpayı, soyutma vasitələri və televizordan istifadə kimi ən sadə imkanlar üçün məhbuslardan pul tələb edilməsi.

Hesabatın davamında insan haqları müdafiəçiləri bildiriblər ki, məhbusların bu şəraitdə saxlanılması, xüsusilə də həbsxanaya köçürülməzdən əvvəl təhlükəsizlik qurumlarının dindirilməsi və təzyiqlərinə məruz qalmış şəxslərin fiziki və psixoloji sağlamlığı üçün ciddi təhlükə yaradır.

Qızılhisar həbsxanası Kərəcdə yerləşir və İranın ən böyük, Yaxın Şərqin isə ən iri cəzaçəkmə müəssisələrindən biri hesab olunur. Rəcaişəhr həbsxanasının bağlanmasından sonra çoxlu sayda siyasi və təhlükəsizlik məhbusu da daxil olmaqla, çoxsaylı məhbus bu həbsxanaya köçürülüb.

Gunaz TV
R.G

GUNAZ.TV

SON XƏBƏRLƏR