Srebrenitsa qətliamı qurbanlarının anım günüdür

SON XƏBƏRLƏR

Srebrenitsa qətliamı qurbanlarının anım günüdür

2026.07.11, 16:43

Srebrenitsa qətliamı (və ya soyqırımı), İkinci Dünya Müharibəsindən sonra Avropada hüquqi cəhətdən sənədləşdirilmiş ilk soyqırım aktı və ən böyük kütləvi qırğındır.

Gunaz.tv

Hadisə 1995-ci ilin iyul ayında Bosniya müharibəsi zamanı baş vermiş və general Ratko Mladiçin komandanlığı altındakı Serb Respublikası Ordusu tərəfindən törədilmişdir. Qətliam nəticəsində 8 300-dən çox silahsız bosniyalı müsəlman (əsasən kişi və oğlan uşaqları) sistemli şəkildə qətlə yetirilmişdir.

BMT Srebrenitsa şəhərini "təhlükəsiz zona" elan etmişdi və bölgədə 400 nəfərlik Hollandiya sülhməramlı kontingenti yerləşirdi. Lakin 11 iyul 1995-ci ildə serb qoşunları hücuma keçəndə sülhməramlılar heç bir müqavimət göstərmədən şəhəri və sığınan əhalini serblərə təhvil verdilər.

Serblər qadın və azyaşlı uşaqları avtobuslarla münaqişə zonasından uzaqlaşdırdılar, lakin 10-65 yaş arası bütün kişiləri ayıraraq meşəliklərdə, anbarlarda və futbol meydançalarında pulemyotlarla kütləvi şəkildə güllələdilər.

Qurbanların cəsədləri kütləvi məzarlıqlara basdırıldı. Cinayətin izini itirmək üçün sonradan bu məzarlar ekskavatorlarla qazılaraq cəsədlərin qalıqları fərqli-fərqli ərazilərə daşındı. Bu səbəbdən bu gün də hələ müəyyən edilə bilməyən təxminən 1000 nəfərin qalıqları DNT analizləri vasitəsilə axtarılır.

BMT Baş Assambleyası tərəfindən qəbul edilən qətnaməyə əsasən, hər il 11 iyul tarixi dünyada Srebrenitsa Soyqırımı Qurbanlarının Beynəlxalq Anım Günü kimi qeyd edilir. Kimliyi yeni müəyyən edilən qurbanların sümükləri hər il iyulun 11-də Potoçari Memorial Qəbiristanlığında dəfn olunur.

GünazTV

GUNAZ.TV

SON XƏBƏRLƏR