Contact Us

SON XƏBƏRLƏR

43 ölkə Ər-Riyadda bir araya gəldi

2026.07.30, 18:38
43 ölkə Ər-Riyadda bir araya gəldi

Səudiyyə Ərəbistanı 43 ölkənin iştirakı ilə yeni beynəlxalq dəniz koalisiyasının yaradılmasını müzakirəyə çıxarıb.

Gunaz.tv

Gunaz TV-nin məlumatına görə, Səudiyyə Ərəbistanının Müdafiə Nazirliyi Ər-Riyadın 43 ölkənin Baş Qərargah rəisləri, nümayəndələri və Avropa İttifaqının təmsilçilərinin iştirakı ilə çoxmillətli dəniz koalisiyasının yaradılmasına həsr olunmuş iclasa ev sahibliyi etdiyini açıqlayıb.

 

Nazirliyin bildirdiyinə görə, koalisiyanın məqsədi dəniz təhlükəsizliyini gücləndirmək, beynəlxalq gəmiçilik marşrutlarını qorumaq və qlobal ticarəti təhdid edən risklərə qarşı birgə fəaliyyət göstərməkdir.

 

İclasda koalisiyanın nizamnamə layihəsi, komandanlıq strukturu və icra mexanizmləri müzakirə olunub. Plana əsasən, koalisiya əsas fəaliyyətini Bab əl-Məndəb boğazı, Qırmızı dəniz və Ədən körfəzində dəniz təhlükəsizliyinin təmin edilməsinə yönəldəcək.

 

Səudiyyə Ərəbistanı həmçinin koalisiyanın təsisçi ölkəsi və əsas qərargahına ev sahibliyi edən dövlət olmağı təklif edib.

 

İclasın sonunda Səudiyyə Ərəbistanı, Türkiyə, Pakistan, Misir, Qətər, Küveyt, Bəhreyn və İordaniya da daxil olmaqla 14 ölkə birgə bəyanat yayaraq koalisiyanın yaradılmasını dəstəklədiyini bildirib. Digər iştirakçı ölkələr isə daxili hüquqi prosedurlar tamamlandıqdan sonra təşəbbüsə qoşulmaq imkanını nəzərdən keçirəcəklərini açıqlayıblar.

 

Səudiyyə Ərəbistanının Müdafiə Nazirliyi vurğulayıb ki, bu koalisiya açıq beynəlxalq müdafiə təşəbbüsüdür və onun məqsəd və prinsiplərini qəbul edən bütün ölkələr ona qoşula bilər.

 

 

GunAz TV
R.G

Açar Sözlər :

SEÇİLMİŞ XƏBƏRLƏR

Çox oxunanlar