Bu iddianı daxildəki bəzi məlumatlı mənbələr irəli sürüblər.

Onların sözlərinə görə, əslində çoxdan aparılan bu işlər son vaxtlar dahada güclənib, həm Azərbaycan Respublikasından, həm də Güney Azərbaycan bölgələrindən olan sənətçilər, yazıçı-şairlər, musiqiçilər, ictimai fallar və Azərbaycan Respublikasında yaşayan iranlılar, təhsil alan tələbələrın cəlb olunması üçün təşəbbüslər artıb.

Həmin məsələ ilə bağlı dolayı və birbaşa təklif alan mənbələr bildirirlər ki, əsas məqsəd "İran Azərbaycanı dili"nin inkişaf etdirilməsi, "Təbrizin Azərbaycan kimliyinin simvolu" kimi təbliğ edilməsi, "dünya azərbaycanlılarının vahid istinad yerinin Təbriz şəhəri olduğu barədə ideoloji təbliğat aparılması"ından ibarətdir.

"Dəfələrlə Azərbaycan Respublikasına səfər etmiş və oradakı xalq və sənət adamları tərəfindən hörmətlə qarşılanmış, məşhurlaşmış və Kəşfiyyat Nazirliyi ilə əlaqəli olduqları ehtimal edilən bəzi sənətçilər, mədəniyyət xadimləri, yazıçı, şair və ictimai, milli-mədəni fəallrın cəlb olunması prosesində xüsusi fəallıq göstərirlər. Onların əsas "qayğı"larından biri Təbrizin Bakının gölgəsində qalması fikrini aşılamaq və bunun dəyişdirilməsi üçün təkliflərin hazırlanması, əməli addımların atılmasından ibarətdir",- məlumatda vurğulanır.

Qeyd olunur ki, bu məsələdə Azərbaycan Respublikasının media və mədəniyyət sahəsində tanınan və İrana gəliş-gediş edən bəzi şəxslərin də xidmətlərindən istifadə olunur:

"Azərbaycan Respublikasının paytaxtında İran Mədəniyyət Mərkəzinin bağlanmasından sonra İran Azərbaycan Respublikasında ideoloji təbliğatın aparılması üçün fəaliyyət metodunu dəyişib və qurduğu yeni şəbəkə vasitəsilə daha incə yollarla bunu davam etdirir. Xüsusən son aylar sosial media şəbəkəsində bu istiqamətdə çox sayda səhifənin, teleqram kanallarının açılması bu plnın tərkib hissədir və vahid mərkəzdən idarə olunan bu şəbəkə Azərbaycan Respublikasının Güney Azərbaycan və İranda yaşayan azərbaycanlılara mədəni təsirinin azaldılmasını da əsas məqsədlərdən biri kimi qabağa aparır".

Qeyd edək ki, neçə ilərdir rəsmi Tehran Azərbaycan Respublikasının mədəni təsirinin qarşısını almaq, İran və Güney Azərbaycanda Azərbaycan ədəbi dilinin yayılmasına mane olmaq və Arazın iki tərəfində yaşayan azərbaycanlıları mədəni-mənəvi ayrılığına nail olmaq üçün çoxsaylı tədbirlər həyata keçirib və bu, indi daha geniş vüsət alıb.

Bundan əvvəl Şərqi Azərbaycan əyalətinin Mədəniyyət və İrşad İdarəsinin rəsmisi Həsən Güli Azərbaycan dilində nəşr olunan kitabların dili ilə bağlı açıqlamasında İranda Azərbaycan ədəbi dilində olan və Azərbaycan Respublikasında qəbul olunmuş dövlət dili qaydalarına riayət edilən kitabların nəşrinə icazə verilməyəcəyini söyləyib:

“Türk dilinin müxtəlif ləhcələri var. Qonşu ölkələrdə də bu dil fərqli ləhcələrdə danışılır və müxtəlif əlifbalarda yazılır. Ancaq əsl türk dili İranda danışılan türkcənin Təbriz ləhcəsidir. Bütün kitablarda bu qaydaya riayət olunmalıdır”, - Güli bildirib.

GünAzTV